Izquierda Xunida reclama que se dea usu industrial al terrén de la térmica de Soutu

Ovidio Zapico pide que’l Gobiernu aclarie’l futuru d’esa zona del conceyu de Tinéu.

El diputáu y coordinador xeneral d'IX, Ovidio Zapico, visitó güei les instalaciones de la térmica de Soutu, en Tinéu, acompañáu de la secretaria de Coordinación Territorial, María José Miranda, y el coordinador local, Víctor Manuel Álvarez, pa reclamar el caltenimientu del usu industrial de la finca.

Ovidio Zapico reprocha qu'entá se desconózca’l futuru d'unos terrenos qu’habíen de caltenese como un elementu para'l desarrollu de la comarca suroccidental. Poro, Izquierda Xunida va esixir al Gobiernu d'Asturies una rempuesta clara sobro'l futuru del espaciu ocupáu pola térmica del Narcea. “Queremos saber qué va a a pasar con estos terrenos el día dempués del so esmantelamientu y nun entra na nuesa lóxica nenguna otra aición que nun seya mantener el calter industrial d'estos suelos”, dixo.

Y venceya esta “incertidume” cola transición enerxética que “nun ta siendo xusta, nin cola clase trabayadora asturiana, nin con territorios y comarques d'Asturies, que nun ta siendo pausada, que nun ta siendo, tampoco, planiada debidamente, porque siempre se nos dixo que la transición enerxética traería consigo una reactivación de la economía, un reaprovechamiento de los suelos y unos nuevos puestos de trabayu” y recordó que va tres años tuviera equí reclamando que nun se cerrara la central.

Amestó que “güei, cuando yá tán trabayando ehí dientro, pa proceder al esmantelamientu, nun tenemos inda claro nin qué va pasar cola catalogación d'estos suelos”. Calificó de “auténtica estafa” la falta de compromisos. Y finó diciendo que “Asturies nun puede ser un territoriu perdedor de la transición enerxética, esiximos una transición enerxética xusta, que cree industria y que cree puestos de trabayu”.

Pela so parte, Víctor Álvarez, quixo afitar que “la situación de la central de Sotu de la Barca ye inesplicable, y tovía más, colos precios de la eletricidá disparaos, ensin ufiertar nenguna alternativa”.