Finó Urbano Rodríguez, maestru, escritor y militante pola llingua asturiana

El vienres pasáu morría en Xixón, la ciudá onde vivía, Urbano Rodríguez Vázquez, a los 72 años d’edá. Foi maestru d’educación primaria, fundador de Conceyu Bable, componente de la Academia de la Llingua Asturiana y collaborador de delles instituciones pola defensa del asturianu demientres tola so vida.

Urbano Vázquez nació en La Moral, Tiuya (Llangréu) en 1949 y estudió Maxisteriu na Universidá d’Uviéu. Nos años setenta yá asistiera a l’Asamblea Regional del Bable y entamara a reivindicar la reconocencia y enseñu del asturianu. Foi fundador de Conceyu Bable en Xixón y nesa época traduce la ceremonies de la misa y el casamientu, y participa nun programa sobre cultura asturiana en Radio Gijón cola que depués va ser la so muyer, Ana Fueyo. Tamién empieza a collaborar na Revista Secha.

Trabayó nel colexu públicu Cabueñes y, más alantre, nel Jacinto Benavente, dambos en Xixón, onde se va implicar nel procesu d’escolarización de la llingua asturiana, siendo parte del Movimientu de Renovación Pedagóxica. Llegó a ser director del colexu de Vega-La Camocha (Jacinto Benavente) onde va entamar una Selmana de Les Lletres y otra montonera d’actividaes demientres munchos años. Tamién al traviés del Centru de Profesoráu de Xixón, va impulsar programes educativos al rodiu del asturianu.

Nel añu 1984 entra na Academia de la Llingua Asturiana como miembru de númberu, de la que va llegar a ser vicesecretariu en 2001. Amás, formó parte nel Conseyu Asesor de Normalización Llingüística de Xixón. A esti llabor, súmase’l d’escritor, publicando llibros infantiles como Nela (1982) o Poemes pa neños (1983), siendo coautor de llibros escolares como Xana o Cuélebre pa usar na clas de Llingua, y faciendo la traducción al asturianu d’El Saltapraos verde (1998), d’Ana María Matute. Amás, asoleyó’l Diccionariu Básicu de la Llingua Asturiana xunto con Pablo Manzano y Félix Ferreiro.

Sentir fonderu de les instituciones asturianistes

Nestos díes, son munches les muestres de sentimientu dende los órganos a los que tuvo venceyáu y que quixeron unviar pallabres de pesar. La Academia de la Llingua llamentaba’l fallecimientu diciendo que “perdemos un home comprometíu y a un amigu col que compartimos munchos trabayos”. Iniciativa pol Asturianu, destacaba la dedicación de “la so vida a la docencia onde siempres s’esforció por tresmitir al alumnáu la importancia del caltenimientu del asturianu”.

Nesa idea, la Oficina de Normalización Llingüística de Xixón falaba de un “gran maestru, lluchaor incansable pola nuestra lingua” y “académicu de la llingua y de la vida” que collaboraba “ufiertando’l so tiempu, conocimientu y esperiencia”. Dende Asturies.com, amestamos el nuestru pésame pela perda d’Urbano Rodríguez y unviamos un abrazu a la so muyer, fíos y nietos, asina como a amigos y restu de familiares.