Sidoro Villa va tomar mañana ‘El Fervinchu’ en La Pola Siero

L’escritor presenta na so tierra el llibru que ganó’l Xoxefa Xovellanos.

La novela El fervinchu, de Sidoro Villa, va presentase esti vienres en La Pola Siero. L’actu, qu’entama la Fundación Municipal de Cultura, va ser na Sala de Cámara del Teatru Auditoriu a les 19:00 hores y va tar dirixíu por la filóloga y maestra de secundaria, Liliana Díaz.

Esta ye la obra ganadora del XLI Premiu Xosefa Xovellanos de Novela en llingua asturiana, qu’entrega la Conseyería de Cultura, Política Llingüístia y Turismu. El fervinchu yá asoleyara n’otres presentaciones, como’l Uviéu Abierto. Sicasí, esta va facese nel conceyu de nacencia del autor de Llieres.

El llibru de Sidoro Villa ta asitiáu na Asturies de los últimos años del sieglu XX y «xira alredor de los llazos familiares y la so duración nel tiempu, enantes y dempués de la muerte, en un contestu rural que termina’l ciclu», como espresara’l xuráu. Otres obres del escritor son A estaya (2016), Tres beyuscos (2019) y Pielgos de llercia (2021).