Suben los contaxos n’Asturies mientres baxen nel restu del estáu

1825 casos nuevos y 7 muertos dende’l vienres

La Conseyería de Salú confirmó güei 1.825 contaxos nuevos de coronavirus diagnosticaos nos últimos cuatro díes. En concretu, el vienres día 18 detectáronse 535 casos; 380, el sábadu; 342, el domingu; y 568, ayeri llunes. Son 162 más que’l llunes selmana pasada. Mientres nel conxuntu d’España foron 54.147 los casos notificaos, que marquen la tendencia xeneral a la baxa.

Nestos cuatro díes dende la última notificación de Salú, finaron 7 persones pol andanciu: 4 muyeres y 3 homes, con edaes ente los 56 y los 99 años. Anguaño, hai 131 pacientes ingresaos con confirmación o sospecha de covid, lo que supón una medra nel númberu de pacientes en planta, anque se mantienen les 16 cames ocupaes na UCI, un 5,59% del total. Polo qu’Asturies sigue nel nivel de riesgu medio (2 de 4).