“¡Volvimos facelo!”: miles de persones salen a la cai'l 8-M convocaes pol movimientu feminista

Depués de les circunstancies del 2021 pol andanciu, el movimientu feminista asturianu tornó a amosar músculu esti 8-M pa conmemorar el Día Internacional de la Muyer. Miles de persones nun dexaben ver cuasi asfaltu dende L’Humedal a la plaza de toros, nuna convocatoria polo menos al mesmu altor que la última en Xixón, nel 2019.

“¡Volvimos facelo!”, apuntaben gayoleres dende les escaleres onde se colocaron les pancartes y se dieron les diferentes intervenciones. Enfrente, muyeres y homes de toles edaes qu’ocupaben tola carretera reclamando igualdá y el final de los machismos mientres la xente siguía llegando al llugar pela carretera la Costa.

Otru ésitu de convocatoria del movimientu feminista organizáu al rodiu la plataforma Asturies Feminista 8M, entemeciendo un mensaxe reivindicativu y de denuncia con fiesta, allegría y, sobre manera, optimismu. “Por una sociedá más xusta y igualitaria, equí tamos les feministes”, aplaudíen los presentes.

‘Con toes y a por toes’ yera’l lema d’esti añu, que rescamplaba na pancarta qu’abría la manifestación, n’asturianu dafechu. Tamién se pudo ver l’idioma nos munchos cartelos caseros que los asistentes lleven con mensaxes que, xunto col color malva carauterísticu, son señes d’esta reivindicación, y que nesti añu incorporaron tamién conseñes contra la guerra.

La música siempre ye protagonista nesta reivindicación, presente a lo llargo de tol percorríu xunto colos glayíos yá bien conocíos por toos. Nel tramu final amás, xunto cola llectura del manifiestu d’esti 8-M, hebo actuaciones, como la de les raperes La Ziega & Sira o Anabel Santiago, pa finar con pandereteres, bailles y batucada.