El movimientu feminista torna a convocar esti 8-M a una gran manifestación “p’algamar una sociedá más igualitaria y xusta”

Esti martes, 8-M, ye’l Día Internacional de la Muyer y el movimientu feminista convoca una serie d’actos reinvindicativos pa conmemorar esta xornada. Al meudía van entamase concentraciones frente a les cases del conceyu del país y a les 19 hores una gran manifestación va percorrer Xixón baxo’l lema ‘Con toes y a por toes’.

“Con toes les muyeres porque dende’l movimientu feminista apostamos pola igualdá dende la diversidá de muyeres que lluchamos polos nuesos derechos. Y a por toes, porque somos munches, porque tamos xuníes, porque somos fuertes y porque tamos convencíes de que tenemos la razón, de que’l movimientu feminista reivindica cola pallabra, cola razón y pola paz p’algamar una sociedá más igualitaria, más xusta y más feminista pa toes”, asegura Begoña Collado, vocera d’Asturies Feminista 8M, qu’espera que la convocatoria de Xixón “sía un clamor”.

La salida va ser a les 19 hores de la plaza de toros p’avanzar per tola carretera la Costa hasta L’Humedal, onde va lleese un manifiestu. Enantes, pela mañana, va haber concentraciones en toles places de les cases del conceyu del país.

Ente les demandes rescamplaes esti añu por Asturies Feminista 8M ta “el fin de la xusticia patriarcal y de la violencia institucional hacia les muyeres; una llei eficaz contra la trata y la esplotación sexual de les muyeres; una educación n’igualdá, una coeducación feminista y una educación afeutivusexual nes aules; el fin de les violencies machistes y sexuales con midíes eficaces y integrales; el desaniciu de la feminización de la probeza, la esplotación llaboral, la fienda salarial, la temporalidá, la discriminación pola maternidá y el suelu pegañosu…, ye necesario qu’algamemos un emplegu dignu, de garantíes y de calidá pa toes; ameyorar les condiciones y la remuneración de los trabayos feminizaos y racializaos como’l de les trabayadores del llar, cuidaos en domicilios, les ‘kelis’…, apura la dignididá salaria y el reconocimientu d’enfermedaes profesionales; una xusticia económica pa les ames de casa, pa les muyeres con pensiones non contributives; el reconocimientu de la nuesa lliberta sexual, de los nuesos derechos sexuales, reproductivos; por unes cais segures; por un albuertu llibre; pola meyora na sanidá pública ensin sesgos de xéneru. Son munches les lluches que nos xunen y que queden por algamar, por eso’l lema d’esti 8-M”.

Na semeya, militantes feministes colos cartelos de la convocatoria d'esti añu n'asturianu y castellanu.