Esti 2022 van convocase otra vuelta les pruebes B2 y C1 d'asturianu

La intención de la Conseyería d'Educación ye que'l títulu puntúe como méritu nes oposiciones próximes de Secundaria, nel 2023.

Esti añu van convocase dos pruebes nueves de certificación de Llingua Asturiana adaptaes al Marcu Común Européu de Referencia pa les Llingües nos mesmos niveles que la convocatoria anterior, esto ye'l B2 intermediu y el C1 avanzáu, el más altu. D'esta forma, los 131 aspirantes que quedaron fuera del primeru l'añu pasáu al tar llendáu l'esame a 300 places y haber 431 solicitúes van poder optar a facelo esti 2022, y los qu'aprobaron van poder esaminase del nivel siguiente.

Asina lo avanzó la conseyera Lydia Espina na Comisión d'Educación d'esta tarde a una entruga de Nuria Rodríguez López, diputa de Podemos, "sobre si se va tener en cuanta na baremación pal concursu oposición del cuerpu de maestros y maestres y del de profesoráu'l B2 d'asturianu". "Nun foi posible pa esta convocatoria" al cuerpu de maestros, apuntó, pero "tamos trabayando pa poder incluyilo na de Secundaria del cursu próximu", aseguró.

Nesi sen esclarió que la vía escoyida pa que puntúe como méritu esti títulu ye l'apartáu de la formación permanente del profesoráu. Na oposición al cuerpu de maestros d'esti añu cada certificáu B2 o de nivel avanzáu algamen 0,5 puntos na baremación del concursu oposición basándose nel Real Decretu 1041/2017, del 22 d'avientu, qu'afita les esixencies mínimes de los niveles d'una serie d'idiomes como'l chinu, el coreanu, el danés, el finés, el griegu, el gaélicu irlandés, l'italianu, el francés o'l xaponés, ente otros, llista na que tamién que tán les llingües cooficiales.

"Anguaño la nuesa llingua asturianu nun ta en dicha numberación, al nun ser llingua cooficial, polo que nun se pue otorgar una calificación nesti apartáu. Nun ta nes nueses manes poro incluyila dientro d'esi apartáu, pero hai otra manera que sí ta nes nueses manes, que ye'l Decretu 62/2001, del 28 de xunu, que regula la formación permanente del profesoráu y que tamos modificando" pa que puedan tener el B2 y el C1 dicha puntuación, esplicó Espina.

"Agraviu comparativu"

Rodríguez López criticó "l'agraviu comparativu" que se produz pol fechu de que "otros idiomes que nun se falen equí puntúen más pa unes oposiciones que l'asturianu". La diputada reclamó pa les llingües propies d'Asturies "una mayor proteición y un reconocimientu, polo menos, igual que'l restu de les llingües.

Na semeya, aspirantes nel bloque escritu de la convocatoria del 2021.