El tabacu torna a les terraces siempre qu’haya dos metros de distancia

Un añu y dos meses depués de la so prohibición, el Gobiernu permite volver a fumar na terraza de los chigres, anque ye necesario una distancia de dos metros pa consumir tabacu, tamién na vía pública. Ye una de les midíes que s’actualicen el sábadu con motivu del ameyoramientu de la situación epidemiolóxica.

La direutora xeneral de Salú Pública, Lidia Clara Rodríguez, y el xefe d’Alertes y Emerxencies Sanitaries, Miguel Prieto, encargáronse de detallar los datos actuales del andanciu y de les modificaciones que va aprobar mañana’l Conseyu de Gobiernu “frutu de los altos niveles d’inmunización de la población asturiana, que yá cuenta con un 94 por cientu de la población diana con pauta completa”, rescampló la sustituta nel cargu de Rafael Cofiño.

Prieto señaló darréu que los oxetivos d’estes midíes que se planteguen son “caltener midíes de proteición individual que yá son conocíes por toos” y “siguir na llinia de fortalecer que los espacios nos que socializamos sían cada vez más saludables”. Asina, la mázcara sigue siendo obligatoria en llugares d’interior, al igual que se sigue esixendo mididores de CO2 naquellos establecimientos nos que’l so usu nun pueda ser continuada como na hostelería.

La principal restricción que se flexibiliza ye’l fechu de fumar en terraces, yá que la norma va quedar en caltener una distancia de 2 metros coles persones que tean alredor, yá sía cuando se consume tabacu nuna mesa o na propia vía pública. Esta restricción taba vixente dende’l 14 de xineru del añu pasáu.

Fin de cuarentenes

Tamién a partir del sábadu van eliminase les cuarentenes de contautos estrechos, con independencia de la so situación vacunal, aplicando asina Asturies l’alcuerdu de la última Comisión de Salú Pública del Sistema Nacional de Salud. Recomiéndase, sicasí, que nos 10 díes posteriores a la esposición se tenga precaución y se reduza tolo posible les interaiciones sociales utilizando de forma constante la mázcara y con una bona hixene de manes.

Otra manera, pasao mañana entra a valir l’aforu completu pa competiciones deportives profesionales, tanto pa estadios como pabellones.