El Premiu al Pueblu Exemplar abre la convocatoria del 2022

El Puertu resultó condecoráu l'añu pasáu con esti gallardón que cuenta con reglamentu espublizáu nes trés llingües falaes nel país.

Hasta'l 14 de xunetu, a les 14 hores, ye posible presentar candidatures pal XXXIII Premiu al Pueblu Exemplar d'Asturies, que convoca la Fundación Princesa de Asturias. Instituciones, centros culturales, asociaciones de vecinos, entidaes y emprees, asina como los ciudadanos que lo deseen, pueden proponer un "pueblu, aldea, nucleu de población, espaciu paisaxísticu o grupu humanu del Principáu d'Asturies que rescamplara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales o otres manifestaciones de solidaridá sobresalientes”.

Ventisiete optaron al gallardón nel 2021, que tien una recompensa de 25.000 euros. Finalmente foi la población somedada d'El Puertu la que resultó premiada.

Respetu a la toponimia oficial

La Fundación Princesa de Asturias vien espublizando'l reglamentu del Premiu al Pueblu Exemplar d'Asturies n'asturianu, gallego-asturiano y castellanu. Tamién respeta la toponimia tradicional, única oficial en 72 de los 78 conceyos, cola previsión del Gobiernu de finar col procesu nesta mesma llexislatura.

Precisamente Somiedo –nome que se va escoyer definitivamente en llugar de 'Somiedu'– ye ún de los seis conceyos pendientes, polo que l'añu pasáu s'emplegó la forma 'Santa María del Puerto', oficial nesti momentu, pa referise a El Puertu.

Na imaxe, gráficu de la Fundación Princesa de Asturias colos 32 gallardonaos col Premiu al Pueblu Exemplar.