La DOP Sidra d’Asturies vivió un 2021 de medría, con un 32 por cientu más de contraetiquetes entregaes

La producción de la Denominación d’Orixe Protexida (DOP) Sidra d’Asturies aumentó un 32 por cientu nel 2021 en comparanza col añu anterior. El Conseyu Regulador cifra’l valor comercial de la bébora certificada fecha con mazana asturiana en más de 5 millones de euros.

El so presidente Guillermo Guisasola y el xerente Daniel Ruiz, acompañaos pol conseyeru de Mediu Rural y Cohesión Territorial, Alejandro Calvo, y la direutora xeneral de Desarrollu Rural y Agroalimentación, Begoña López, dieron a conocer esta mañana estos datos. El volume d’entrega de contraetiquetes nel añu 2021 asitióse en 4.091.000, un 32 por cientu más que l’añu anterior.

Les ventes danse mayoritariamente en chigres, un 80 por cientu, anque la merca nel llagar o en llinia aumentó un 22 por cientu. Les sidres esplumoses crecieron un 36 por cientu, según la declaración de ventes nos propios llagares, dende les 118.000 botelles hasta les 160.000.

En sidra natural produxéronse 2.597.238 llitros, de los que’l 94 por cientu se consumen n’Asturies. El 5 por cientu véndese n’España, mentes que namái un 1 por cientu va pa fuera del Estáu.

6 millones de llitros en total

“Dende la DOP Sidra d’Asturies somos optimistes pa esti presente añu, anque dientro d’un escenariu de prudencia máxima esperando que, por fin, podamos volver a la normalidá absoluta”, apuntaron. 33 llagares y 376 collecheros con 950 hectárees inscrites conformen esta Denominación d’Orixe, qu’ellaboró 6.107.056 llitros nel 2021 con 8.360.391 quilogramos de mazana.

Na semeya, López, Calvo, Guisasola y Ruiz. Nel gráficu inferior, fechu pol Conseyu Regulador, históricu de contraetiquetes de sidra natural DOP Sidra d'Asturies.