Barbón yá piensa na llexislatura próxima pa la reforma del Estatutu

“Nun hai 27 votos, y si nun hai 27 votos nun hai reforma del Estatutu sacante que dalgún partíu cambie de posición nos meses vinientes”, asume Adrián Barbón. El presidente del país valora que Foro ta fuera de la negociación llueu d’unes declaraciones de Carmen Moriyón y yá pon l’horizonte nel 2023, na llexislatura próxima.

La presidenta de Foro “non nuna respuesta, sinón en trés”, recordó Barbón, dio por finada les conversaciones nuna entrevista’l sábadu nel programa ‘La lupa’ de Canal 10. El votu del so diputáu –el segundu, Pedro Leal, ta espulsáu del partíu– ye necesario pa la suma de los trés quintos de la Cámara, esto ye 27, yá que FSA (20), Podemos (4) y IX (2) sumen 26, pero la negativa a ceder a la esixencia de reformes fiscales –los trés partíos d’izquierda yá lo fixeren na otra demanda, los trés quintos pa l’aprobación de la llei que desendolque la oficialidá– por parte de la coalición, mesma postura adopatada llueu polos socialistes al refugar la contraufierta de la formación morada pa desbloquiar la situación, impide l’alcuerdu.

“Si dalgún partíu camuda de posición d’equí a los meses próximos y se sumen los 27 votos habría reactivación del debate”, apuntó’l llavianés, mui críticu cola postura de la derecha, que calcó en que “si la reforma nun incorpora la oficialidá nun la vamos impulsar”. El bloquéu na negociación confirmáu nos díes últimos “entiendo que pueda xenerar frustración. Lo que yo-y digo a los ciudadanos y ciudadanes d’Asturies ye somos un pueblu que nunca se rindió y que nun nos vamos rendir agora, que nel 2023 los ciudadanos van tener oportunidá de decidir si quieren dotar de 27 votos necesarios pa esa reforma del Estatutu”.

Na semeya, Barbón esta mañana en Cangas del Narcea, onde acudió a la puesta en serviciu de la UVI móvil del área sanitaria II que va dar serviciu n'Allande, Degaña, Ibias, Tinéu y nel propiu conceyu cangués.