IX propón habilitar el branu na Xunta Xeneral pa tener una reforma del Estatutu’l 1 de setiembre

“Proponemos reiniciar de forma inmediata esti procesu, superando’l marcu fiscal”, apuntó'l vienres Ovidio Zapico, coordinador xeneral d’IX. La coalición plantega habilitar el branu na Xunta Xeneral pa tramitar la reforma del Estatutu y presentala’l 1 de setiembre nel Congresu, y, al igual que Podemos y Foro, insiste en reclamar lideralgu a la FSA.

“Énte la recuperación del marcu de la negociación, esiximos la retirada inmediata de les propuestes fiscales de Foro y de Podemos Asturies del procesu”, reclamó Zapico. Entiende que fraya cualesquier posibilidá de certificar el consensu esistente cola oficialidá y abre una vía peligrosa pela derecha.

IX, que nun quixo escaecese de la importancia calendariu pa poder aprobar la norma n’Asturies y nes Cortes nesta llexislatura, afirma que “hai una última oportunidá: sería habilitar el branu pa terminar los trabayos nel Parllamentu asturianu”. D’esta forma’l 1 de setiembre podría presentase nel Congreso pa entamar cola tramitación en Madrid.

“Habilitemos el branu y lo que faiga falta”

Rafael Palacios, voceru de Podemos, llueu de conocer la propuesta d’IX, declaró “habilitemos el branu, habilitemos lo que faiga falta. Sigamos dialogando, sigamos negociando y que’l Partido Socialista asuma la so responsabilidá”. “Animólos a que nos convoquen yá a una mesa de negociación el llunes próximu o’l martes, yá, esta fin de selmana”, añadió.

Sobre la so propuesta fiscal, señaló “que tenía un oxetivu y ta cumplíu, que yera mover, mover; que se produxera esta situación d’abrir otra vegada’l debate y la reforma estatuaria”. “Hai un marcu de posibilidá y esperemos agora que’l Partido Socialista faiga una propuesta que tamién pueda incluyir a Foro y recuperemos esi impulsu”, insistió’l de Ciañu.

Tamién criticó la pasividá de la FSA y esixó lideralgu a los socialistes Adrián Pumares. “Tán na retaguardia esperando a ver si los demás negociamos, pautamos y alcordamos”, censuró’l secretariu xeneral de Foro.

Na semeya, Zapico nuna intervención na Xunta Xeneral.