“Nun podemos perder más tiempu”, avisa la XDLA, que convoca una concentración na Xunta Xeneral pal xueves

La Xunta pola Defensa de la Llingua Asturiana (XDLA) convoca pa esti xueves a la ciudadanía p’acudir la tarde d’esti xueves a la Xunta Xeneral p’arrodiar el Parllamentu formando una ‘O’ que simboliza la oficialidá. “Nun podemos perder más tiempu”, avisa’l coleutivu énte la situación na que tán les negociaciones pa la reforma del Estatutu.

Trés meses depués de la histórica manifestación qu’enllenó’l centru d’Uviéu cola esperanza de que fora la última de la historia pola oficialidá, va entamase una movilización nueva pa reclamar la igualdá de los derechos de los falantes d’asturianu y gallego-asturiano colos de castellanu n’Asturies. Yá venía la XDLA esti tiempu anunciando de la posibilidá d’una convocatoria énte l’allargamientu d’unes negociaciones activaes realmente esti mes, una vegada aprobaos los Presupuestos Xenerales, pero los fechos últimos propiciaron esta movilización.

Hai xusto una selmana llegaron a un puntu de bloquéu pola esixencia de reformes fiscales de Foro pa dar el so necesariu votu pa llegar a los 27 necesarios, ensin alcuerdu na izquierda. El vienres Podemos facía por reactivar les negociaciones con una propuesta de rebaxes fiscales qu’estudien los partíos, trés díes enantes de la segunda fecha llende marcada nun primer momentu pola izquierda, que se cumple güei y que, como vienen comentando los actores implicaos, nun ye definitiva.

Mentanto, la XDLA quier salir a la cai otra vuelta pa “recorda-yos a los nuestros diputaos y diputaes que los derechos de les persones falantes d'asturianu y de gallego-asturianu nun son aplazables o recortables. Querémoslos yá”. “Nun podemos perder más tiempu”, insiste’l coleutivu, que considera que “aquellos partíos que crean na igualdá y na ampliación de derechos tienen que llegar a un alcuerdu ensin más demoranza. Los que queden fuera d'esi alcuerdu o voten en contra van demostrar que tán nel llau de los qu'apuesten pola esclusión y la intolerencia”.

Coles banderes de la campaña pola oficialidá

La convocatoria del xueves, a les 19.30 hores na Xunta Xeneral, pretende formar una gran ‘O’ qu’arrodie’l Parllamentu del país. “Trai la bandera de la oficialidá y súmate a la defensa de los nuestros derechos”, anima la organización, que yá fixo una aición asemeyada na plaza la Catedral d’Uviéu en mayu a la xornada siguiente del XLII Día de les Lletres Asturianes.

Na semeya, un momentu de la manifestación del 16-O, última celebrada, nel so pasu al altor de la Xunta Xeneral.