Detecten el primer casu d'ómicron silenciosa

Rexistráronse 1.867 casos esti xueves.

Una muyer d'ente 40 y 50 años non vacunada ye la primer persona a la que se detecta la nomada variante ómicron silenciosa del coronavirus SARS-CoV-2 nel país. Presentaba síntomes leves el día 19 y yá ta recuperada.

La seición de Viroloxía del Llaboratoriu de Microbioloxía del Hospital Universitariu Central d'Asturies (HUCA) detectó esta variante nuna muestra aleatoria d'una PCR positiva, que nun presentaba les mutaciones habituales d'ómicron. Esti procedimientu ye habitual pa buscar variantes y llinaxes del SARS-COV-2.

La ómicron silenciosa (BA.2) carauterízase por ser entá más contaxosa que la primera ómicron (BA.1) y produz una infeición leve.

Dos finaes

La Conseyería de Salú confirmó 1.867 contaxos ayeri, 292 menos que'l miércoles, cuando se rexistraron 2.159 –nun primer momentu foron 2.160–. Ye'l tercer día de baxada de los casos de COVID-19.

Na xornada finaron dos muyeres de 90 y 72 años, polo que'l total de muertes nel andanciu aumenta a 2.289. Mentes, xube'l númberu de persones hospitalizaes, pasando de 434 a 454.

D'ellos 405 tán en planta, 18 más que'l miércoles, y 49 na UCI, 2 más. La ocupación total por esta patoloxía nes plantes hospitalaries ye del 12,99 por cientu y del 15,96, de manera respeutiva.

Na semeya, l'HUCA illumináu colos colores del arcu la vieya nel so sétimu aniversariu, el xunu pasáu, en reconocimientu al esfuerzu de los sos profesional y n'agradecimientu a la ciudadanía.