L'ALLA convoca al Plenariu de la institución en sesión urxente y estraordinaria

"L'Academia de la Llingua Asturiana (ALLA), que presido, convoca pa mañana, martes, en sesión urxente y estraordinaria, al Plenariu de la institución con un únicu puntu nel orde del día: 'Reforma del Estatutu y Oficialidá: análisis y responsabilidaes'", anunció Xosé Antón González Riaño esta tarde. Pela mañana celebróse'l tercer aconceyamientu d'esti mes de negociación entes les fuercies polítiques favoratibles, ensin alcuerdu poles demandes fiscales de Foro.

Una vegada aceptada por FSA, IX y Podemos la esixencia de los trés quintos p'aprobar la Llei de Normalización que desendolcara dicha oficialidá, y ensin que la redaición del artículu 4 fora un problema pa los grupos parllamentarios, los impuestos quedaben como única barrera pal alcuerdu, hasta'l puntu de bloquiar la negociación. L'ALLA tien previsto facer una comparecencia pública "pa plantegar les consecuencies sociales d'estes decisiones polítiques y les responsabilidaes no tocante al llogru de la oficialidá".