Dolfo Camilo Díaz algama'l Premiu de la Crítica

El XXI Premiu  de la Crítica de l'Asociación d'Escritores d'Asturies na modalidá de narrativa n'asturianu correspondió-y a Dolfo Camilo Díaz por Skull City y otres histories.

El llunes 27 d’avientu de 2020 a les 18:00 hores, axuntó de forma telemática’l xuráu del Premiu de la Crítica de l’Asociación d’Escritores d’Asturies (AEA) na categoría de narrativa n’asturianu, conformáu polos escritores María Luz Pontón, José Ángel Gayol, Víctor Suárez Piñero ya Inaciu Galán, en representación de  l'AEA, como secretariu con voz pero ensin votu.

Tres destacar el contentu pola bona participación y sobre manera pola calidá de les trés obres presentaes como candidates al premiu, lo que pal xuráu fala del bon momentu del  panorama de la narrativa n’asturianu, aldericóse sobre les mesmes, tomándose por unanimidá’l determín de declara ganador del premiu al llibru Skull City y otres histories, d’Adolfo Camilo Díaz, asoleyáu por Ediciones Trabe. 

El xuráu destacó de la obra, confomada por trés noveles curties y dellos rellatos, la calidá narrativa y l’atrevimientu na temática variada de les hestories, que consiguen llevar elementos de la cultura popular al papel con mui bon resultáu estéticu.