Tornen les restricciones: l’ociu nocherniegu pieslla’l martes y la hostelería va poder abrir hasta la 1

“Son midíes mui dures, pero necesaries”, aseguró’l conseyeru de Salú, Pablo Ignacio Fernández Muñiz. Dende’l martes l’ociu nocherniegu va tar peslláu per un mes y la hostelería va poder abrir según llicencia, anque nunca más allá de la 1 de la madrugada, col pasaporte COVID-19 necesariu p’acceder a los llocales.

Juan Cofiño, presidente en funciones, anunció nun primer momentu la decisión del Conseyu de Gobiernu estraordinariu d’esta mañana d’establecer esti documentu que certifica qu’una persona ta vacunada o pasó la enfermedá como obligatoriu pa poder acudir a discoteques y llocales d'ociu nocherniegu, establecimientos de xuegu y apuestes, hostelería, ximnasios, visites a centros sociosanitarios, eventos multitudinarios o instalaciones deportives o de cultura nes que se permita'l consumu de bébores y comida, una vegada recibíu’l preste del Tribunal Superior de Xusticia d’Asturies. Tamién adelantó l’aprobación de restricciones a la hostelería dende’l martes a les 00 hores, qu’especificaría darréu Fernández Muñiz, y ayudes a la hostelería como compensación.

“Siempre punximos perriba de cualquier otra cosa la preservación de la vida y la salú de les persones; foi asina dende l’orixe, nestos cuasi dos años, y sigue siéndolo agora y va siguir siéndolo asina nel futuru. La vida y la salú perriba de cualquier otra circunstancia, económica o de cualquier naturaleza”, apuntó Cofiño, que defendió la “proporcionalidá nes midíes” alcordaes esta mañana.

Conversaciones con otres autonomíes

Éstes decidiéronse depués de buscar puntos comunes con otres autonomíes. Asina, confirmó que “güei mesmu aconceyaron los direutores xenerales de Salú Pública d’Aragón, de Navarra, de La Rioja y nosotros. Tamién se tuvieron conversaciones con Cantabria y a última hora xunióse al aconceyamientu’l País Vasco, buscando un consensu en cuanto a unes exes de trabayu que coinciden coles qu’aprobamos en Conseyu de Gobiernu”.

N’Asturies, nesi contestu, “y énte la grave situación na que tamos, algamando esta selmana la cifra máxima de contaxos en tola pandemia”, decidióse “el pieslle del interior del ociu nocherniegu per un mes, vixente dende la nueche del llunes al martes”, y que “los establecimientos d’hostelería y restauración, sacante los espacios destinaos a terraces, van tener como hora de pieslle la llegalmente autorizada, pero ensin poder superar en nengún casu la 1 de la madrugada. Gasolineres y comercios tampoco nun van poder vender alcohol de 22 a 6 hores.

“Son midíes que sabemos que son mui dures, yá les vivimos en dalgún momentu de la fase de la pandemia, pero tamién sabemos que son necesaries. Tenemos que parar al virus enantes de llegar a una situación insostenible pa la nuesa rede sanitaria y pa la nuesa sociedá”, afirmó Fernández Muñiz, qu’enantes fixo un resume ampliu de la situación actual de la pandemia. “Asturies ta anguaño nuna situación de riesgu global de 3 sobre 4”, esplicó, mentes que “el nivel de tresmisión ta nun nivel d’alerta 4, el máximu, con dos noticies diferentes: una poco favoratible, que ye l’incrementu de la incidencia global, y, dalgo más favoratible, una estabilización na incidencia de les persones mayores de 65 años, probablemente en rellación con un altu niver de cobertura de la dosis de recuerdu”.

Mentes, a nivel asistencial el nivel de riesgu ye’l 3, con una ocupación hospitalaria del 6 por cientu en planta y del 15,9 por cientu na UCI, detectándose “un descensu nes tases d’hospitalización global y de la UCI nos últimos 7 díes en comparanza cola velocidá d’incrementu de los ingresos”. Sicasí, col aumentu de la incidencia que tamos viviendo, “si nun tomamos midíes” habrá un aumentu de les hospitalizaciones y “una presión mui grande sobre l’Atención Primaria”.

Por último, Fernández Muñiz quixo destacar que “la vacunación funciona y que’l so impautu en términos de disminución d’enfermedá grave ye mui importante”, afirmando que n'Asturies "más de 7 de cada 10 hospitalizaciones son evitaes gracies a la vacunación con pauta completa y cuasi 8 de cada 10 na UCI". D’igual forma, tornando a les midíes, incidió na importancia de la ventilación d’interiores y recomendó evitar aconceyamientos de más de 10 persones nestes feches navidiegues.

Na semeya, Cofiño y Fernández Muñiz.