L’asturianu podría recibir fondos estatales pa la so promoción pol apoyu del PP a una enmienda de Compromís a los PXE

El PP sofitó esti martes nel Senáu una enmienda de la Chunta Aragonesista presentada por Compromís sobre la Carta Europea de les Llingües que devuelve los Presupestos Xenerales del Estáu (PXE) al Congresu. Asturies podría recibir fondos estatales de salir alantre na Cámara Baxa esta modificación de les cuentes pa dar 1,6 millones d’euros a les comunidaes billingües.

“Promoción y difusión de les llingües protexíes pola Carta Europea de les Llingües Rexonales o Minoritaries, a les comunidaes autónomes de Galicia, Asturies, Euskadi, Navarra, Aragón, Cataluña, València, Illes Balears”, afita la enmienda presenta pol senador Carles Mulet y apoyada pol PP. Javier Maroto xustifica la postura del so grupu en que votaron “toles enmiendes al PXE d’otros grupos que coincidan cola nuesa posición”, apuntando darréu que’l PP lleva apoyando la Carta “dende’l 1992”.

Sicasí, especificó qu’esta postura nun significa “sofitar la cooficialidá del bable”. El voceru popular na Cámara Alta celebró la devolución de los PXE al Congresu, lo que retrasa la so aprobación una selmana, yá que'l proyeutu s'aprobó con 148 votos a favor, 112 en contra y 2 astenciones.

Compromís, amás del PP, tuvo pa esta enmienda l’apoyu d’ERC, Junts y EAJ-PNV. De ratificase’l martes nel Congresu, destinaríense 1,6 millones pa la promoción de les llingües d’estos territorios que, de repartise proporcionalmente, supondríen 200.000 euros pal asturianu y el gallego-asturiano.

Na semeya, un momentu del Plenu de güei nel Senáu.