Ordiales entama presentaciones de 'Llugares máxicos d'Asturies'

El biólogu y escritor va tar acompáu por Alberto Álvarez Peña en trés de les cites programaes.

Bertu Ordiales ta inmersu nuna xira de presentaciones del so llibru billingüe de gran formatu ‘Llugares máxicos d’Asturies’, actos que se vieron frenaos nel so momentu pol entamu de la pandemia de COVID-19. Entamó ayeri na llibrería mierense La Pilarica y va siguir esta tarde, a les 19 hores, na Casa la Cultura de La Pola (Ḷḷena).

Yá mañana va treslladase a Xixón, al Conseyu de la Mocedá (19 hores), pa falar d'esta obra na que presenta 60 allugamientos del país "señalaos, onde atopar dalgo especial, dalgo máxico, anque non nel sentíu esotéricu. Son llugares físicos qu’heredamos d’otres etapes, como la megalítica, o de la naturaleza”, como esplicaba l'autor a Asturies.com cuando entamó col proyeutu, asoleyáu al traviés d'una esitosa campaña de micromecenalgu.

Nesta cita va tar presente Álvarez Peña, al igual que la que va repetir en Xixón el día 29, nesti casu na llibrería La Buena Letra a les 20 hores, y el 30 n'Uviéu, na Llibrería Trabe a les 19.30 hores.