“Si de min depende, sí o sí va haber reforma del Estatutu d’Autonomía”, afirma Barbón

VOX cumplió un día más cola so promesa d’entrugar en tolos plenos a Adrián Barbón sobre la reforma estatutaria y la oficialidá. “¿Arrenunció por fin a la reforma del Estatutu d’Autonomía?”, preguntó Ignacio Blanco, a lo que’l presidente respondió “non”, pa na réplica posterior afirmar que “si de min depende, sí o sí va habela porque lo merez Asturies y Asturies ha ser dueña de los sos destinos”.

El voceru de VOX reclamó al socialista qu’esplicara “qué va facer, cuál ye’l siguiente pasu” y aseguró tener motivos pa pensar que “el so proyeutu estrella d’esta llexislatura yá quedó aparcáu” y que va querer allancalu “culpando a otros”. “Sí, creo que ye necesaria la reforma del Estatutu, créolo”, retrucó Barbón, “y creo qu’hai que buscar los consensos necesarios”.

Apuntó que “tamos analizando les condiciones d'un grupu, que ye'l votu decisivu, el del señor Pumares”, al igual que'l restu de grupos parllamentarios, y que “el PSOE yá dixo qu’aceptamos sí o sí la de los trés quintos, que nun tenemos nengún problema. Y punximos una segunda condición, que ye que tamos dispuestos a llegar a un alcuerdu sobre temes fiscales siempre y cuando sía un alcuerdu a parte múltiple con Izquierda Xunida, Podemos, nós y Foro Asturias. Nosotros sí creemos na necesidá reforma del Estatutu” porque, “ente otros razones, nun tuvo esi procesu d’actualización d’esos estatutos de segunda xeneración que tuvieron llugar n’otres partes d’España”.

Darréu’l socialista echó en cara a Blanco’l deséu del so partíu “d’acabar cola autonomía política d’Asturies” y finó la so intervención confirmando que “si de min depende, sí o sí va haber reforma del Estatutu d’Autonomía porque se lo merez Asturies y Asturies ha ser dueña de los sos destinos”.

Semeya obra d'Armando Álvarez.