El diputáu vascu Matute participa nuna xornada centrada nes alternatives a la precariedá

Andecha Astur entama en Xixón '¡Dami tira!', onde tamién van intervenir David M. Rivas o Juan Manuel Martínez Morala, ente otros.

'Solidaridá y socialismu n'Asturies d'anguañu' acompaña a la simbólica frase pa dar nome a esta xornada centrada nes "alternatives frente a la precariedá y la esclusión a les que mos conderguen les polítiques del Estáu español p’Asturies". Va principiar mañana a les 11 hores nel Hotel Begoña y ye abierta al públicu.

Mario Arbesú va moderar una mesa d'alderique que va tar compuesta por Rivas, profesor xubiláu d’Estructura Económica de la Universidad Autónoma de Madrid; Morala, de la Corriente Sindical d'Izquierda (CSI); Lola Villacob, de Pueblo y Dignidad, y la CSI; Boni Ortiz, d'Anticapitalistes Asturies; y Llucía Fernández, d'Andecha Astur. Na mesma analizaráse la situación na que s’afaya bona parte de la población asturiana, a la busca d’alternatives válides feches a partir de los principios universales de la solidaridá y el socialismu.

Va completar l'actividá una intervención d'Oskar Matute, diputáu nel Congresu d'EH Bildu, organización que participa xunto con Andecha Astur na coalición Agora Repúbliques creada de cara a les Europees. Pa finar va abrise un turnu d'entrugues.

La formación nacionalista, de cara a esta cita, rescampla que "el 27 % de los asturianos vive na probitú; el 35,7 por cientu de la mocedá ta en paru, el mayor porcentaxe d’Europa; el 89,9 por cientu de les contrataciones son temporales ya’l 40 por cientu a tiempu parcial; Asturies llidera l’índiz estatal de desigualdá social; nel 10 por cientu de los llares asturianos naide nun tien trabayu; y Asturies pierde 36 moraores diarios".

Semeya propiedá d'EH Bildu.