L'ALLA acueye una 'editatón' de Wikipedia

Coordínala Víctor Suárez y dividíse en dos partes, la primera d'elles teórica sobre la enciclopedia llibre y la edición d'artículos.

El llar de l'Academia de la Llingua Asturiana (ALLA) acueye mañana dende les 16 hores una 'editatón', xera na que delles persones se xunten col oxetivu de crear conteníu nuevu en Wikipedia. Ye ún de los alcuentros d’edición de Wikipedia n’asturianu encuadrada nes actividaes que ta entamando Wikimedia España estes selmanes n’Asturies en collaboración cola Direición Xeneral de Gobernanza Pública, Tresparencia, Participación Ciudadana y Axenda 2030.

En primer llugar Suárez va encargase d'esplicar a los participantes qué ye la Wikipedia y cómo s’edita nella, pa depués dar pasu a un trabayu d'edición de conteníos rellacionaos cola llingua asturiana dientro del proyeutu, lo qu’inclúi la creación y l’ameyoramientu d’artículos y tamién la xubida d’imáxenes a Wikimedia Commons pal so usu na Wikipedia. L'actividá va allargase per trés hores y la xente interasao n'acudir a la 'editatón ha unviar un corréu electrónicu a info@wikimedia.es.

Wikipedia n'asturianu ye un proyeutu qu'echó a andar nel 2004 qu'anguaño tien 128.351 artículos asoleyaos, lo que convierten al nuesu idioma nel 63 na llista d'entraes na enciclopedia llibre, per detrás del galés y per delantre del volapük, idioma artificial creáu pol alemán Johann Martin Schleyer nel 1879. La comunidá asturiana que ta tres d'ella fai un esfuerciu enorme de creación y acuriosamientu de los mesmos, pero siempre son poques manes pa esta xera.