Sigue la tendencia ascendente de contaxos

La selmana pasada rexistráronse 222 positivos de COVID-19, una media diaria de 32, polos 154 comunicaos na anterior.

Anque entá en cantidaes baxes, sigue la tendencia ascendente de la pandemia. Si ochobre arrancó con 11 casos nuevos diarios, finó esti domingu con 32: de 74 contaxos a la selmana a 222.

La media de positivos diarios en periodos de 7 díes evolucionó dende l'entamu de la cuarta fola de la manera siguiente: 51, 57, 196, 448, 493, 423, 289, 194, 133, 77, 60, 42, 20, 12, 13, 11, 13, 17 y 22, hasta los 32 actuales. Un aumentu progresivu'l mes pasáu que, sicasí, nun se reflexa na presión hospitalaria.

El domingu había 27 pacientes hospitalizaos, 7 menos que la selmana anterior. En planta, con confirmación o sospecha de COVID-19, taben ingresaos 22, 6 menos; y 5 na UCI, 1 menos.

No que respeuta a les muertes, hebo que llamentar 1 nel periodu del 25 al 31 d'ochobre. El total de finaos nel andanciu cola enfermedá causada pol coronavirus SARS-CoV-2 aumenta poro a 2.080.

Na semeya, una de les primeres ciudadanes en recibir la tercer dosis de la vacuna de la COVID-19 y la del gripe, campaña qu'entamó ayeri.