L'asturianu nel Botánicu: incumplimientu del Plan de Normalización y de 34 actividaes nenguna usa l'idioma

Esparden otra noticia falsa más sobre una supuesta imposición de la llingua asturiana.

"Instrumentalizar", "imponer", "impidiendo a les families que nun son asturfalantes disfrutar d'esti recursu"... Son dalgunes de les espresiones emplegaes por Ciudadanos en Xixón p'atacar la única de les 4 actividaes entamaes nestes feches festives por Tolos Santos nel Xardín Botánicu Atlánticu en Xixón que s'entamó en llingua asturiana.

Una quexa que nun tardó en saltar a les redes sociales y inclusive a medios estatales, yá cola maquinaria en marcha p'atacar l'asturianu y torgar el procesu abiertu pal reconocimientu de los derechos de los sos falantes. Pero lo cierto ye que l'espaciu asitiáu en Cabueñes tien escaecíu l'idioma hasta'l puntu d'incumplir dende hai cinco años los planes de Normalización Llingüística, que tanto na versión de 2016 como la que s'aprobó en 2020, afiten la rotulación billingüe de les instalaciones municipales. Nel casu de la instalación xixonesa tola rotulación atópase en castellanu y n'inglés.

Dase la circunstacia de que Ciudadanos en Xixón votó a favor del Plan de Normalización de 2016 y qu'en 2020, depués d'anunciar que diba votar a favor, decidió abstenese.

Otru exemplu ye que de les 34 actividaes programaes d'equí a final del añu nin una use la llingua asturiana. La esceición única recién a esta dinámica foi'l cuentacuentos 'La bruxa del Botánicu', destinada a la reciella, precisamente oxetu d'esta protesta y noticia falsa de supuesta imposición del idioma.

Actitú "llamentable"

Iniciativa pol Asturianu asoleyó un comunicáu al respeuto nel que denuncia que "resulta llamentable falar d’inmoralidá cuando namái un cuartu de les propuestes d’actividaes tán n’asturianu. Resulta mui difícil de comprender la defensa de la Llei d’Usu con esa crítica a la única actividá n’asturianu nel Xardín Botánicu y pidimos a Ciudadanos que se posicionen de forma clara: ¿Tán pola aplicación de la Llei d'Usu del asturianu o realmente quieren facer desapaecer l'asturianu de tolos espacios nos que tien una mínima presencia?".

Na semeya, la bruxa del Botánicu.