Asturies rexistra'l primer casu de la nueva variante delta plus, más contaxosa

Ye una muyer de más de 90 años que taba ensin vacunar. Caltiénense otru mes por precaución les restricciones nel deporte profesional.

El conseyeru de Salú, Pablo Ignacio Fernández Muñiz, confirmó esta mañana la presencia n'Asturies de la variante delta plus. Yeren delles les autonomíes que veníen detectando casos con esta evolución de la india, con una creciente espansión n'Inglaterra, y güei'l país rexistró'l so primer casu.

"Ta n'estudiu la trescendencia que pueda tener esta variante. Sí se sabe que pue ser un poco más tresmisible", apuntó'l responsable, que confirmó que "la variante alfa, la británica, yera un 50 por cientu más tresmisible que la orixinal de Wuhan; la que surdió depués, la delta, que s'orixinó na India, yera un 50 por cientu más que l'alfa; y ésta ye un 10 o 15 por cientu más que la delta normal". 

Sicasí, rescampló que "nun hai indiciu nengún de que s'escape a la vacunación nin d'otres coses que nos esmoleceríen más". El primer casu de delta plus n'Asturies correspuende a una muyer mayor de 90 años ensin vacunar.

Ensin comer nin beber

La presencia d'esta variante del coronavirus SARS-CoV-2 y la tendencia ascendente de la incidencia obliga a les autoridaes a la prudencia. Asina, va caltenese un mes más, hasta que fine payares, la prohibición de beber y comer nos campos de fútbol de Primera y Segunda y nos pabellones d'ACB, onde sigue'l 80 por cientu d'aforu máximu.

Na semeya, Fernández Muñiz esta mañana na inauguración del XXXVIII Seminariu d'Inxeniería Hospitalaria que se ta celebrando nel Palaciu de Congresos del xixonés Recintu Ferial Luis Adaro.