Na selmana última tornaron a baxar los casos de COVID-19: 11 diarios de media

El vienres hebo que llamentar una muerte depués de nueves díes ensin finaos.

La selmana última rexistráronse 74 casos nuevos de COVID-19, la cantidá más baxa dende xunetu del añu pasáu. Principió con 70.845 casos confirmaos y finó ayeri con 71.919 –l'actualización rebaxa la cantidá a 71.914 por duplicaos en díes previos–.

Supón una media diaria de 11 contaxos. Dende qu'Asturies.com vien rexistrando esti datu, a lo último d'agostu del 2020, ésti evolucionó asina: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196, 448, 493, 423, 289, 194, 133, 77, 60, 42, 20, 12 y 13, hasta los 11 actuales.

Esta fin de selmana la Conseyería de Salú, a falta de la espublización de los datos oficiales de la COVID-19, informó de 26 positivos: 13 el vienres, 6 el sábadu –l'actualización rebáxalo a 3– y 7 el domingu, con una tasa de positividá diaria esta xornada última del 0,6 por cientu. El xueves esti porcentaxe a 7 díes taba nel 1,01 por cientu –ayeri baxó al 0,80 por cientu–.

La muerte d'un home de 81 años, el vienres, foi la noticia más negativa d'estos díes. Ye la 2.069 del andanciu y llega depués de nueves xornaes ensin finaos.

Hai 16 pacientes hospitalizaos en planta con confirmación o sospecha de la enfermedá causada pol coronavirus SARS-CoV-2, 7 más que'l xueves, a los qu'hai que sumar otros 6 ingresaos na UCI, 3 menos.

Na imaxe, el presidente Adrián Barbón na so visita a La Felguera pa participar na inauguración d'Arkuos Espacio de Acción Social Educativa, onde anunció'l fin de les restricciones n'Asturies, sacantes les xenerales pa tol Estáu, pola COVID-19 que se va concretar esta selmana. Semeya recortada a partir de la orixinal d'Armando Álvarez.