“Reconocer los drechos llingüísticos al traviés de la oficialidá ye trabayar pola llibertá y pola pluralidá”, recuerda Llera

Iniciativa pol Asturianu ta aconceyando estos díes colos partíos políticos que participen nes negociaciones pa la reforma del Estatutu, a los que-yos solicita “enfotu y altor de mires”. El presidente del coleutivu, Iván Llera, recuerda que “reconocer los drechos llingüísticos al traviés de la oficialidá ye trabayar pola llibertá y pola pluralidá”.

L’alcuentru con Daniel Ripa, de Podemos, abrió esta ronda d’alcuentros, al que siguieron xuntes con Álvaro Queipo, del Partido Popular (PP), y con Adrián Pumares, de Foro. Esta selmana ta confirmada la cita colos parllamentarios d’Izquierda Xunida (IX), mentes que cola Federación Socialista Asturiana (FSA) ta pendiente de fecha, ensin previsión de momento de vese con Ciudadanos.

Llera ta aprovechando estos alcuentros pa treslladar a les formaciones la necesidá de trabayar “con enfotu y altor de mires” nestes conversaciones: “Tamos nel momentu más importante pal idioma en munchos años. La ciudadanía merez un debate seriu, con sentíu común y con altor de mires p’algamar la oficialidá de les nuestres llingües”, insistió.

“Ye un deber moral iguar una situación de falta de drechos de la ciudadanía asturfalante. Iguar esa situación depende de tolos representantes de la Xunta Xeneral. Facemos un llamáu a los partíos qu’arrenuncien a la oficialidá a entender que reconocer los drechos llingüísticos al traviés de la oficialidá ye trabayar pola llibertá y pola pluralidá”, siguió’l presidente de la organización.

Nesi sen, apuntó que “nun podemos entender cómo ye posible defender la oficialidá de diferentes llingües n’otres partes d’España y equí oponese”. “Ye necesario que nesti debate sobre la oficialidá toles fuercies y representantes faigan por entendese, aprovechar esta coyuntura histórica y sentir a la sociedá”, finó Llera.