IX y Podemos planteguen un calendariu pa la reforma del Estatutu: el 30 de payares debería tar acordáu’l testu

El 21 de xunu ye la fecha que marquen Izquierda Xunida (IX) y Podemos p’aprobar la reforma del Estatutu d’Autonomía qu’incluya la oficialidá del asturianu y del gallego-asturiano. Dambes formaciones planteguen un calendariu parllamentariu de tramitación qu’afita’l 30 de payares como fecha llende pal acuerdu sobre la propuesta.

“Ye l’únicu calendariu posible pa poder llegar a l’aprobación al final del periodu de sesiones”, afirmó Ovidio Zapico, coordinador de la coalición. Según esti cronograma, el 7 d’avientu se rexistraría na Xunta Xeneral cola vista de que s’aldericara la toma en consideración nel Plenu del 9 de febreru.

“Abríase’l procesu’l pasáu 8 de setiembre, pero faltaba poner feches, y equí ta una propuesta de feches de Podemos y Izquierda Xunida, que ye la única vidable p’aprobar esti Estatutu d’Autonomía nesta llexislatura, contando con que tien qu’aprobase depués nel Congresu de los Diputaos”, apuntó darréu Daniel Ripa, secretariu xeneral de Podemos. Sobre la posibilidá de que llegue a bon puertu, pa lo que son necesario 27 diputaos, declaró que “somos mui optimistas”.

Zapico rellató que nel primer alcuentru col drián Barbón, el 16 de setiembre, yá propunxeron el final d’esti periodiu sesiones como fecha llende p’aprobar el testu, “que’l propiu presidente compartía. Lo que fiximos agora ye dir d’esa fecha hasta acá pa dir acotando’l calendariu”, esplicó. “Vamos facer tolo que tea políticamente nes nueses manes pa que sía asina”, aseguró.

Nacionalidá histórica

La formación morada insiste na so propuesta de declarar a Asturies nel Estatutu como nacionalidá histórica, al igual que se definen asina Euskadi, Catalunya, Galicia, Andalucía, Illes Balears, Canarias, Aragón y la Comunitat Valenciana, esto ye, 8 de les 17 autonomíes, anque Ripa confirmó que “nun va ser un puntu de bloquéu. Nun va ser un puntu de bloquéu nada de lo que proponga Podemos Asturies porque lo importante ye que lleguemos a un alcuerdu de 27 diputaos, que sía una mayoría amplia, y que lo faigamos nel plazu que se tien que facer”.

Na imaxe, Cristina Tuero Ordóñez y Ripa, de Podemos, y Zapico y Víctor Suárez, d'IX. Semeya obra d'Iván G. Fernández.