"La xente que se manda del asturianu pal so trabayu aporta un valor añadíu", afirma García

"Son profesionales perfectamente billingües que si utilicen l'asturianu ye porque quieren", respuende'l direutor xeneral de Política Llingüística énte una crítica "inxusta".

Antón García quixo emplegar los cinco minutos finales de la so comparecencia a pidimientu de Ciudadanos "pa qu'informe sobre tolo rellacionao con tolos asuntos de la so competencia" na Comisión de Cultura, Política Llingüística y Turismu, pa defender a toles persones que trabayen en llingua asturiana. "Duelme muncho sentir a dalgún de los diputaos qu'intervieno referise a la poca profesionalidá que demuestren eses persones", lo que calificó de "mui inxusto".

"Y voi esplicar por qué. Porque en realidá la xente que se manda del asturianu pa facer el trabayu que quiera facer ye xente qu'aporta un valor añadíu a la realidá profesional d'Asturies. Son profesionales perfectamente billingües que si utilicen l'asturianu ye porque quieren la mayor parte de les veces, porque saben porque se formaron voluntariamente. Reconoce-yos esi valor añadíu, esi trabayu que faen, ye lo menos que podemos facer con ellos, sían profesionales de los medios de comunicación, docentes, xente del mundu del teatru, de la música, de la lliteratura...", añadió.

Estes pallabres vinieron por un comentariu de Pedro Leal, diputáu espulsáu de Foro, na so toma de posición, que na so defensa de "los bables" fixo una crítica al asturianu emplegáu na TPA y RPA polos sos profesionales, al que se refirió como llingua fabricada a partir de "les subvenciones de la so direición xeneral". "Comparamos l'acentu, la entonación, la pronunciación, el vocabulariu del que fala na televisión con la de cualquier habitante de pueblu o aldea de la nuesa Asturies real y auténtica y nun se paez en nada", dixo.