El Día de la Reciella, una xornada “familiar, non sólo infantil, con actividaes n’asturianu”

Axedrez, fútbol, valtu, música o cosplay… Son munches les actividaes preparaes pa esti sábadu pal VIII Día de la Reciella, una xornada “familiar, non sólo infantil, con actividaes n’asturianu”, esplicó David Guardado, componente de la xunta direutiva d’esti coleutivu de families, qu’anima a averase al Muséu del Pueblu d’Asturies y a participar nelles.

El Salón de Receiciones de la Casa Conceyu acoyó esta mañana la presentación del VIII Día de la Reciella, que vuelve con allegría depués d’un añu de parón pola pandemia, anque “al 90 por cientu”. Nun va entamase la carrera de relevos que simboliza la tresmisión xeneracional del asturianu de güelos a nietos, ‘Entaína’, nin talleres que requieran manipular oxetos, pero dende ‘Reciella. Families pol Asturianu’ celebren poder entamar esta xornada familiar col asturianu como llingua vehicular cola esperanza de que nel 2022 puedan retomase toles actividaes.

Miguel Barrero, direutor de la Fundación Municipal de Cultura, Educación y Universidá Popular, acompañó a Guardado nel actu. “Ye un eventu perimportante nel que vien collaborando’l Conceyu”, remembró, p’afirmar depués que “l’asturianu ye un idioma universal y tien la capacidá d’afayase en tolos contestos posibles”.

El representante de Reciella detalló darréu caún de los eventos programaos pal sábadu. La inauguración de la xornada, que va desendolcase na zona del tendayu, ta prevista a les 11.30 hores, pa principar al meudía con un averamientu al xuegu del axedrez a cargu de Belarmino García Suárez, del Club Deportivo Antonio Rico, cola collaboración de la Oficina de Normalización Llingüística, que va poner tamién un puestu informativu.

Neñes y neños de la cantera del UC Ceares van participar a les 12.30 hores nun cuadrín d’exhibición, que va comentar Pelayo Rodríguez, responsable de ‘La xugada’ en PlayPresta, ente otros proyeutos. Pa les 13 ta prevista una de les novedaes d’esti añu, una exhibición de valtu, llucha tradicional asturiana que la Federación Asturiana de Llucha ta recuperando nos años últimos.

Dos conciertos

La hora de la xinta va tar amenizada poles neñes y neños de la Banda de Gaites El Gumial y por Llevólu’l Sumiciu, dos hermanos que presenten un proyeutu de música y audiovisuales reinterpretando al tradición asturiana. Yá de tarde, va instalase un mercadín de lliteratura y música pa la reciella, cola presencia de La Fabriquina, Trabe y Pintar-pintar, editorial ésta última que va poner un cuentacuentos, a les 16.30 hores, de la mano de Lluis Aique Iglesias y el so llibru nuevu ‘Lin sube a Carabín’.

Shiro Ychigo, nomatu emplegáu por Blanca Fernández nel mundu del cosplay, va falar sobre ésti a les 17 hores, otra de les novedaes d’esti añu. “Los rapazos van faciéndose mayores y tenemos que dir actualizándonos, polo qu’incorporamos esta práutica que-yos presta tanto a los preadolescentes”, esplicó Guardado.

A les 17.30 hores, en collaboración con Cuatro Gotes Producciones, les neñes y neños presentes van grabar mensaxes al futuru sobre cuestiones “de medioambiente, igualdá, l’asturianu…, lo que quieran”, cola intención de recuperalos en 10 años. El conciertu ‘Kikirikikí’, con Alicia Álvarez y David Varela, va poner el ramu a la xornada, que nun se va pesllar cola tradicional danza prima, “anque dalgo fadremos” pa despidir esta prestosa iniciativa nel que “toles collaboraciones son desinteresaes”.

La presentación finó cola proyeición del videoclip del cantar promocional del VIII Día de la Reciella, ‘L’asturianu sal con nós’, de Xaime Martínez. “Ye un xuegu de pallabres que pretende esponer que l’asturianu nun ye una cosa de casa; que cola pandemia y el volver salir otra vez de casa, l’asturianu sal con nós y podemos usalu en cualquier ámbitu”, esplicó Guardado, que recordó que la xornada del sábadu ye un cita abierta de calter familiar, “nos sólo infantil”, na que poder vivir 7 hores d’actividaes de tou calter n’asturianu dafechu.