“Sorpréndeme que la señora Mallada nun quiera n’Asturies lo que’l presidente Feijóo sí quier pa Galicia”, afirma Barbón

El Gobiernu caltiénse firme na so defensa de la oficialidá na reforma del Estatutu. El día depués de los aconceyamientos colos grupos parllamentarios tanto la vocera Melania Álvarez García como’l presidente Adrián Barbón calcaron nel respetu a la pallabra dada al eleutoráu nesti asuntu, amosando’l llavianés la so sorpresa poles declaraciones “fuera” de la popular María Teresa Mallada “que nun-y escuché dientro” de la xunta.

“Los políticos si dalgo tenemos que tener ye pallabra. El día que yo nun tenga pallabra perdería tola credibilidá énte’l pueblu asturianu, y nós fuimos con un programa eleutoral que yera productu d’unes resoluciones del 32 congresu de la Federación Socialista Asturiana”, confesó esta mañana en Bulnes pa confirmar que la oficialidá yera dalgo innegociable na reforma estatutaria. Pallabres asemeyaes a les d’Álvarez na rueda de prensa posterior al Conseyu de Gobiernu: “¿por qué díbemos a arrenunciar a un compromisu eleutoral?”, entrugó.

Celebró Barbón que los partíos que nun consideraben necesaria la reforma del Estatutu, esto ye, PP y Ciudadanos, acudieran a la citación del Gobiernu y amosaran ayeri la so disposición a negociala. “¡Cómo nun va ser necesariu modernizalu si va cumplir n’avientu 40 años!”, esclamó.

Sicasí, quixo facer un apunte al respeuto de les declaraciones de Mallada sobre la oficialidá, nes qu’afirmó que si’l Gobiernu arrenuncia a ella l’alcuerdu llegaría “mañana mesmo” y que “l’asturianu nun pue ser oficial na nuesa comunidá”. Unes pallabres “que-y escuché fuera y que nun-y escuché dientro de la xunta. Sorpréndeme que la señora Mallada nun quiera n’Asturies lo que’l presidente Feijóo si quier pa Galicia. Ye una cosa cuanto menos llamativa”.

El Gobiernu, fuera de la negociación

El llavianés confirmó tamién que’l Gobiernu nun va participar nes negociaciones a partir de los 11 puntos propuestos ayeri. “Dende agora esti alderique tresfierse dafechu a los grupos parllamentarios pa ver si hai los votos que los padres del Estatutu decidieron que yeren necesarios p’aprobar una reforma”, apuntó; esto ye, 27 de los 45 diputaos de la Xunta Xeneral.

Sobre’l modelu d’oficialidá, Álvarez señaló que “tendremos que construyilu con toos aquellos grupos que busquen l’alcuerdu y colos que podamos llegar a ún lo más ampliu posible”, entendiendo que “la responsabilidá nun cai namái nuna de les partes”.

Na semeya, Barbón nel funicular de Bulnes con motivu del venti aniversariu de la so inauguración.