“Tenemos un compromisu eleutoral y nun vamos arrenunciar a la oficialidá”, asegura Carcedo

Llueu de les xuntes col grupu parllamentariu d’IX, del PP y de Podemos sobre la reforma del Estatutu, y enantes d’aconceyar con Ciudadanos y Foro, la vocera socialista Dolores Carcedo fixo una valoración de les mesmes. Dixo que tán siendo “positives” y aseguró que “tenemos un compromisu eleutoral y nun vamos arrenunciar a la oficialidá”.

Nos alcuentros, señaló, “ponemos enriba de la mesa auquellos aspeutos que queremos abordar nesta reforma y tamién escuchamos los plategamientos y posición de los diferentes grupos y les sos propuestes al respeuto”. Entes ellos ta la declaración d’oficialidá del asturianu, un asuntu sobre’l que la Federación Socialista Asturiana (FSA-PSOE) tien “un compromisu eleutoral” del que “nun vamos arrenunciar”.

Una vegada pasada esta primer toma de contautu en Presidencia, la negociación “va treslladase a los grupos parllamentarios na sede de la Xunta Xeneral, y mantendremos contautos y xuntes periódiques pa poder algamar un alcuerdu sobre una propuesta d’actualización del Estatutu d’Autonomía”. La intención socialista ye la de llegar “al mayor consensu posible”.

Sobre los plazos, Carcedo confirmó que l’oxetivu ye trabayar pa “tener l’actualización del Estatutu aprobáu a lo últimu del próximu periodu de sesiones”, esto ye, pa xunu.