Amigos y familiares d’Elías García axuntáronse en Baselgas nel segundu cabudañu del músicu

Hai dos años la música asturiana perdía a Elías García, referencia nel folk pol so facer en bandes como Llan de Cubel, Felpeyu o Tuenda y destacáu ornitólogu. Pa recordar la so memoria amigos y familiares axuntáronse en Baselgas esta fin de selmana y siguen preparando l’anunciáu homenaxe públicu, retrasáu agora al 2022 a la espera d’un ameyoramientu definitivu de la situación sanitaria.

La xuntanza en Baselgas foi, por esti motivu, restrinxida. Los asistentes pudieron disfrutar al aire llibre de conversaciones y, sobre manera, música, con García siempre na memoria.

Pa esta seronda taben previstos dellos actos públicos d’homenaxe concentraos nuna mesma fin de selmana en Villaviciosa, como conciertos, actividaes musicales, esposiciones de fotografía y instrumentos musicales, y un congresu d’ornitoloxía centráu n’avifauna del país, en particular, y de la Iberia eurosiberiana, en xeneral, cola presencia de destacaos espertos de dientro y fuera d’Asturies. Tamién se prepara una aición de reforestación popular con especies autóctonas nun monte ocupáu agora por una plantación d’ocalitos.

Finalmente estes actividaes n’alcordanza d’Elías va treslladase al 2022 a la espera d’una situación sanitaria estable que permita’l so desendolcu con normalidá y cola mayor participación posible.