Barbón fala d’una “reforma parcial del Estatutu” que va impulsar enfotándose “nel diálogu”

La entrega de les Medayes d’Asturies foi l’únicu actu institucional entamáu esti añu pol Día d’Asturies. Adrián Barbón, que tornó a emplegar les trés llingües falaes nel país, usó l’asturianu pa referise a una “reforma parcial del Estatutu” que quier impulsar enfotándose “nel diálogu”, que, puntualizó, “nun significa unanimidá”.

La Comisión de los 8 que s’encargó de la ellaboración del anteproyeutu del Estatutu d’Autonomía, norma que cumple esti añu 40, recibió la medaya d’oru del país. Ésta tuvo formada por Francisco Sosa Wagner y Bernardo Fernández, pol PSOE; Juan Bautista Fernández Hidalgo y Juan Casero, pola UCD; Ignacio de Otto y Francisco Bastida, pol PCA; y Juan Luis de la Vallina, sustituyíu n’ocasiones por José Luis Martínez López-Muñiz y José Manuel Riesco, pola Coalición Democrática, de los que finaron De Otto, De la Vallina y Riesco.

“Anguaño vamos encarar una reforma parcial del Estatutu. Nesti actu que fai homenaxe a los autores del primer testu, prométo-yos que voi impulsala col enfotu constructivu qu’ellos demostraron va yá cuatro décades, col so mesmu empeñu nel diálogu”, apuntó en llingua asturiana'l presidente Barbón. Al empar, señaló que “diálogu nun significa unanimidá”.

En gallego-asturiano dio les felicitaciones, tamién a María Neira, direutora de Salú Pública de la Organización Mundial de la Salú (OMS), y el Club de Guisanderas de Asturias, medayes de plata. “Doctora María Neira, representantes del Club de Guisanderas y integrantes da Comisión dos Oito, norabúa. Con vosoutros recuperamos a entrega de medayas, a tradición propia del Día d’Asturias, de tal xeito que sodes protagonistas por partida dobre d’úa edición singular d’este acto”, dixo.

Nel actu celebráu nel Eurostars Hotel de la Reconquista’l socialista quixo reivindicar, frente a los totalitarismos, la democracia y los derechos algamaos baxo l’amparu de la Constitución y los diferentes estatutos autonómicos, recordando que “derechos nun signifiquen imposiciones”.

Na semeya, Barbón xunto con componentes de la Comisión de los 8 y familiares d'ellos.