El Gobiernu d’Asturies impulsa un teléfonu de baldre p’atender a les víctimes de la LGTBIfobia

El Principáu cunta dende güei con un teléfonu gratuitu, el númberu 635 178 634, p'atender d'una manera áxil y profesional les necesidaes de persones víctimes de la LGTBIfobia. Esta llinia va tar operativa les 24 hores del día, tolos díes del añu, tanto pa llamaes convencionales como pa mensaxería per whatsapp.

Esti serviciu nuevu va poder utilizalu cualquier persona que se considere víctima d'un delitu de LGTBIfobia o que conoza la esistencia de dalgún fechu que pueda ser consideráu agresivu, discriminatoriu, denigrante o ofensivu pa con esti colectivu.

Les consultes van respondese nel menor tiempu posible con asesoramientu profesional y una atención cercana y rápida que va incluyir sofitu psicolóxicu si ficiere falta.

L'oxetivu d'esti serviciu ye facilitar que toles persones puedan vivir llibremente y exercer tolos sos derechos acordies cola so orientación sexual, ensin sufrir nengún tipu d'agresión o discriminación.

Les llamaes van ser atendíes por emplegaos y voluntarios de l'asociación Xega y la llínea va financiase al traviés d'una subvención nominativa por importe de 10.000 euros. Estes mesmes persones van ser les encargaes de facer el siguimientu de los casos.

Datos disponibles

En 2019, últimu añu pal que se disponen cifres, Xega recibió 250 pidimientos d'atención ya información, de les que mediu centenar taben rellacionaes directamente con situaciones de vulnerabilidá. En 2020, un añu nel que s'amenorgó significativamente el contactu social por cuenta de la pandemia del coronavirus, rexistráronse 148. D'elles, un 14% tuvieron como principal razón de ser la denuncia d'una agresión o situación de discriminación. El restu repártense ente solicitúes d'información (75%) y demanda d'atención psicosocial (11%).

La mayoría de les llamaes fueron de ciudadanos del Principáu (63%), d'ente 18 y 25 años (41%) y nel 69% de los casos fízoles la mesma víctima de los fechos denunciaos. El restu de les llamaes ficíeronles familiares de les víctimes (15%), trabayadores de centros educativos (9%) y otres persones conocedores de los fechos. De tolos rexistros documentaos, 21 (14,2%) son de casos de persones LGTBI en situación de vulnerabilidá.

La conseyera de Presidencia, Rita Camblor, y la directora xeneral de Mocedá, Diversidá Sexual y Derechos LGTBI, Clara Sierra, presentaron güei esti nuevu serviciu, que s'enmarca nes polítiques que desenvuelve'l Gobiernu d'Asturies contra'l “discursu del odiu” y pa protexer a toles persones y asegurar el llibre desenvolvimientu de la so personalidá.

“L'odiu nun ye daqué individual, sinón que se constrúi colectivamente y precisa de tol esfuerzu d’esti Gobiernu pa paralo”, sorrayó Rita Camblor.

Desque la Conseyería de Presidencia asumió les polítiques d'igualdá pa les persones LGTBI, púnxose en marcha, amás d'esti teléfonu gratuitu, un observatoriu asturianu contra la LGTBIfobia y un sellu de deporte inclusivu. Igualmente, xubieron les ayudes destinaes a entidaes que tengan ente los sos fines favorecer la igualdá y aumentar la presencia del Gobiernu d'Asturies n'actividaes inclusives, como'l festival de cine LGTBI. 

Semeya: La conseyera de Presidencia, Rita Camblor, y la directora xeneral de Mocedá, Diversidá Sexual y Derechos LGTBI, Clara Sierra, na presentación d'esti serviciu.