El pieslle del interior del ociu nocherniegu allárgase otros 14 díes

El conseyeru Pablo Ignacio Fernández Muñiz recuerda que la situación "ye sensiblemente peor" a cuando se permitió l'apertura en mayu. Esti xueves rexistráronse 85 casos nuevos.

El llunes fina la segunda prórroga del pieslle del interior del ociu nocherniegu y de la prohibición de la venta d'alcohol en comercios y gasolineres de 22 a 6 hores, midíes que se van allargar otra vuelta 14 díes más, hasta'l 6 de setiembre. L'ameyoramientu de los datos de la pandemia nun ye consideráu suficiente pol Executivu, que tomó esta decisión esta mañana en Conseyu de Gobiernu.

“La situación epidemiolóxica va ameyorando de manera progresiva, pero entá ye sensiblemente peor que la que esistía cuando adoptamos midíes de flexibilización pal sector n'ondes epidémiques previas”, esplica el responsable de Salú. En concreto, la incidencia actual a 14 díes ye de 187,09 casos cada 100.000 habitantes, cuando'l 28 de mayu, cuando se permitió la so apertura, yera de 70,28.

Les restricciones actuales aportaron con 527,10, mentes que na prórroga última entróse con 301,54. "Conscientes de que la situación va meyor, hemos siguir guiándonos pola prudencia, especialmente si tenemos en cuenta que tamos na temporada braniega, con delles selmanes entá per delante de gran movilidá, lo que conlleva l'aumentu de la interacción social", añadió Fernández Muñiz.

Otra manera, el Serviciu de Salú del Principáu d'Asturies (SESPA) entamó a dar cita pa la vacunación a les persones que pasaron la enfermedá ente los cinco y los dos meses últimos. Hasta agora alministrábase a partir de los seis meses, decidiendo reducir esta cantidá pol avance de la campaña y la disponibilidá de preparaos suficientes.

Un fináu

A falta de la espublización de los datos oficiales de la COVID-19, la Conseyería de Salú informó de la detección ayeri de 85 casos nuevos. Son 9 menos que'l miércoles, cuando se comunicaron 94.

El SESPA fixó 1.867 pruebes de diagnósticu d'infeición activa, polo que la tasa de positividá s'asitió nel 6,37 por cientu, superior a la de la xornada anterior, cuando quedó nel 5,21 por cientu. A 7 díes esti porcentaxe yera enantes de l'actualización del 7,01 por cientu –ayeri baxó al 6,68 por cientu–.

Un home 57 años finó cola enfermedá causada pol coronavirus SARS-CoV-2, la 2.045 del andanciu. Güei conocióse la muerte tamién d'una muyer de 37 que dio a lluz en Xixón por cesárea, que se contabilizará previsiblemente mañana.

Hai 74 pacientes hospitalizaos con confirmación o sospecha de COVID-19, 15 menos que'l miércoles. Mentes, siguen na UCI otros 23 ingresaos.

Na semeya, un momentu del Conseyu de Gobiernu d'esta mañana, na que dalgunos conseyeros, como Alejandro Calvo y el propiu Fernández Muñiz, participaron de manera telemática.