La organización de la 'novillada' de Cangues lleva la corrida a Aragón

Fundación Toro de Lidia agradez el sofitu del equipu de gobiernu municipal y anuncia la so intención d'organizala nel conceyu nel 2022.

El festexu clasificatoriu del Circuito de Novilladas del Norte previstu esti domingu nuna finca privada de Mestas de Con va caltenese, anque nun se va celebrar n'Asturies. El llugar escoyíu pa qu'Isaac Fonseca, Villata y Álvaro Burdiel 'lidien' seis nuviellos ye la población aragonesa d'Ariza.

La razón d'esti cambiu ye la negativa de permisu, por parte de la Confederación Hidrográfica del Norte, pa instalar una plaza portátil nesi llugar magar que la plaza portátil taba práuticamente montada. La organización del eventu taurín, qu'agradeció'l sofitu recibíu del equipu de gobiernu municipal del PP –asegura que s'encargó de diseñar l'espaciu pa celebrar la corrida en dicha finca–, confirmó la so intención de que Cangues d'Onís tenga una prueba nesti circuitu de 'novilladas'.

Protesta na villa

Esta mañana tuvo llugar la segunda concentración n'oposición a los toros en Cangues d'Onís, convocada nesta ocasión en solitariu por Huellas del Sella col sofitu d'otros coleutivos, llueu dela celebración d'un Plenu estraordinariu cola 'novillada' como tema. Una vegada algamáu l'ésitu de frenar la cita del domingu, anque non por oposición al maltratu animal, sinón por deficiencies alministratives por parte de la organización, l'oxetivu de la protesta foi lluchar "por una Asturies llibre de tauromaquia".

Na semeya, momentu d'entrega'l miércoles nel Rexistru de Cangues d'Onís de les más de 55.000 firmes contra la 'novillada', campaña que finó con 57.758 sofitos.