Salú comunica 198 contaxos esti llunes

Hai que llamenta la muerte d'una muyer de 91 años y un home de 89 na xornada.

A falta de la espublización de los datos oficiales de la COVID-19, la Conseyería de Salú comunicó la detección de 198 contaxos de COVID-19 –l'actualización aumenta esta cantidá a 202 por contaxos non contabilizaos en feches anteriores–. Son 40 más que'l domingu, anque con una tasa de positividá menor, del 8,80 por cientu llueu de la realización de 3.224 pruebes de diagnósticu d'infeición activa pol 9,80 por cientu del día anterior.

Esti porcentaxe a 7 díes yera enantes de l'actualización del 11,91 por cientu –ayeri baxó al 11,61 por cientu–, en tendencia descendente depués de llegar a superar el 14 por cientu. La Organización Mundial de la Salú (OMS) marca'l 5 por cientu como referencia a partir de la que s'empieza a perder el control de la pandemia.

El total del finaos nel andanciu cola enfermedá causada pol coronavirus SARS-CoV-2 algama yá la cantidá de 2.006 –l'actualización aumenta la cifra a 2.007– tres la muerte ayeri d'una muyer de 91 años y d'un home de 89. Hai 155 pacientes hospitalizados con confirmación o sospecha de COVID-19, a los qu'hai que sumar 33 que tán na UCI, 2 y 3 más que'l domingu, de manera respeutiva.

Na semeya, caxes cola vacuna de Moderna pa siguir cola campaña n'Asturies recibíes la selmana pasada.