Llectura de poemes pa dar a conocer el númberu 18 de 'Formientu'

Esti volume de la revista de lliteratura moza preséntase per segunda ocasión en Xixón.

Depués de dase a conocer nun actu de la Feria del Libro de Xixón el mes pasáu, los codireutores de 'Formientu', Diego Solís y Claudia Elena Menéndez, van participar mañana nun eventu nuevu pa dar a conocer el númberu 18 de la revista. Nesta ocasión va ser na sede de Cuatro Gotes Producciones, nel barriu L'Arena, y va contar tamién con una llectura de poemes.

Inaciu Galán, ex direutor y editor, va facer d'anfitrión, mentes que van encargase de recitar autores como Gonzalo Llamedo, Alma Hidalgo o Raúl Alonso. Esti númberu especial recueye una variada esbilla de testos de los y les participantes del #FormientuEnCasaFest, festival en llinia celebráu nos meses del confinamientu.

L'actu, con entamu previstu a les 19.30 hores, ye abiertu al públicu, anque hai qu'acutar plaza al tar l'aforu llendáu pa cumplir colos protocolos de seguranza pola COVID-19. L'asistencia pue confirmase al traviés del corréu electrónicu oficina@cuatrogotes.com, comunicando'l nome, el DNI y un teléfonu de contautu de los asistentes.

Puntos de venta

Amás de na propia oficina de Cuatro Gotes, el númberu 18 de 'Formientu' ta a la venta en Paradiso, Central, La Revoltosa, La Buena Letra, Atenea y La Librería de Bolsillo, en Xixón; Cervantes y Trabe, n'Uviéu; Clarín y Casona, n'Avilés; La Llocura y La Pilarica, en Mieres; La Semeya, en Noreña; Campoamor y Clarín, en La Felguera; Campoamor, en Sama; Sol, en L'Entregu; Las Dos Vías, Sandra y Trasgu, en Grau; y Arco Iris y Don Quijote, en Navia.

Na semeya, responsables de la revista y autores na presentación celebrada'l mes pasáu na Feria del Libro de Xixón.