Asturies supera la incidencia más alta de tola pandemia

El llunes algamó los 674,73 casos cada 100.000 habitantes nos 14 díes últimos. Esti martes rexistráronse 442 casos nuevos de COVID-19.

Nesta cuarta fola Asturies yá superó la cantidá más alta d'incidencia acumulada de les trés anteriores. Hasta'l momentu la cifra más alta foron los 658,53 del 2 de febreru, cantidá que se superó anteayeri y que se prevé siga aumentando.

La Conseyería de Salú, a falta de la espublización de los datos oficiales de la COVID-19, comunicó la detección de 442 casos nuevos ayeri –l'actualización aumenta esta cifra hasta 460–. Son 28 menos que'l llunes, cuando informó de 470.

El Servicio de Salú del Principáu d'Asturies (SESPA) fixo'l martes 4.171 pruebes de diagnósticu d'infeición activa, polo que la tasa de positividá s'asitió nel 14,22 por cientu, superior a la de la xornada anterior, del 13,78 por cientu. A 7 díes esti porcentaxe yera enantes de l'actualización del 13,99 por cientu –ayeri xubió al 14,45 por cientu–.

Nun se rexistró muerte nenguna cola enfermedá causada pol coronavirus SARS-CoV-2, polo que la cifra total de finaos del andanciu caltiénse en 1.986. Otra manera, aumenta en 14 el númberu de persones hospitalizaes en planta con confirmación o sospecha de COVID-19, hasta 113, mentes siguen 20 na UCI.

Na imaxe, gráfica del Observatoriu de la Salú n'Asturies cola evolución de la incidencia acumulada a 14 díes na segunda, tercer y cuarta fola.