Barbón pon fecha pal entamu del procesu de reforma del Estatutu: “setiembre”

“El trámite ha facese de la forma más rápida posible si queremos llegar a tiempu al Congresu de los Diputaos pa la so tramitación posterior”, confirmó’l presidente Adrián Barbón sobre la reforma del Estatutu d’Autonomía pa, ente otros asuntos, oficializar l’asturianu y el gallego-asturiano. “Setiembre” ye’l mes nel que va entamar el procesu.

El socialista cumple güei dos años dende que tomó posesión como presidente del país y, por esti motivu, quixo facer un balance d’estos 24 meses de llexislatura. Un tiempu nel que’l so Gobiernu, recordó, “tuvo qu’afrontar la pandemia”, asina como “la reactivación económica”, amás d’apuntar los retos nuevos pa lo que-y queda de mandatu y rescamplar la so apuesta pol diálogu y “la recuperación de l’autoestima y reivindicación de l’asturianía”.

Nel so discursu, centráu nestos cinco exes, nun citó la reforma del Estatutu, pero al ser entrugáu por ello confirmó que “setiembre” ye’l mes nel que va entamar el procesu, que “ha facese de la forma más rápida posible si queremos llegar a tiempu al Congresu de los Diputaos pa la so tramitación posterior”. Ente los temes a incluyir va tar, como vien apuntando Barbón, la oficialidá del asturianu y del gallego-asturiano.

Situación “más difícil dende la Guerra Civil”

Barbón aseguró qu’estos dos años “nada nun tienen que ver colo que yo esperaba naquel momentu”, cuando la toma de posesión. Aportó la pandemia de COVID-19, “una situación estraordinaria” qu’afontar, “la más complexa de l’Asturies autonómica dende llueu y, si tuviéramos qu’echar la vista atrás, la más difícil dende la Guerra Civil española”.

Rescampló “la respuesta asturiana” al coronavirus, con “una triple perspeutiva: la respuesta sanitaria, la respuesta social y la respuesta educativa”. Nesi sen quixo llamar l’atención “sobre un fecho non menor, como ye l’ausencia d’una quinta fola, porque ésta ye la cuarta”, a diferencia de lo asocedío n’otres autonomíes “gracies a adoptar midíes preventives, decisives y valientes cuando yera necesaria adoptales”, buscando siempre “l’anticipación”.

“Tamién somos el Gobiernu qu’afrontamos la reactivación económica”, siguió Barbón, qu’apuntó que tamos “nel cuartu mes siguíu nel qu’apreciamos, de forma sensible y contundente, un descensu del númberu de paraos; un incrementu nel númberu de persones afiliaes a la Seguridá Social, con descensos del paru especialmente importantes en sectores como la construcción, la industria y servicios”. Una situación que “vien a confirmar lo que siempre diximos: el control de la salú pública yera siempre la meyor garantía pa la reanimación económica”.

Tres nomar “delles bones noticies qu’hai que poner enriba de la mesa”, como’l contratu de Santa Bárbara, el trámite ambiental de la regasificadora, el desbloquéu de la ZALIA, el rescate de Duro Felguera y la llegada d’Amazón, rescampló “como fitu de llexislatura” l’anuncia d’ArcelorMittal, cola presencia “de los sos máximos dirixentes y el presidente del Gobiernu d’España”, d’un “procesu de descarbonización de la producción siderúrxica que va significar un enantes y un depués”, con un “efectu contaxu na industria asturiana”.

Autoestima y arguyu d’asturianía

En tercer llugar, el socialista citó la so decisión d’afrontar retos nuevos, “porque enriba de la mesa hai retos nuevos qu’esixen decisiones valientes, como la reforma de l’Alministración asturiana, una reforma que nun tien comparación dende lo último de los años 80 y lo primeros de los 90, necesaria pa ganar n’eficacia y n’axilidá; pa ser una institución menos burocratizada y muncho más resuelta; y sobre manera pa valorar el talentu”. Una Alministración, amás, “compremetida cola igualdá y la diversidá”.

“Somos un Gobiernu, si me permiten la espresión, que trabaya en coalición colos ciudadanos y ciudadanes d’Asturies; un Gobiernu cercanu y que fai del diálogu la so bandera”, rescampló como cuartu puntu. Cifró en 10.000 el númberu de correos electrónicos “recibíos y contetaos” en presidencia@asturias.org dende l’entamu de la pandemia y reivindicó l’alcuerdu pa “tomar decisiones en beneficiu d’Asturies”.

Pa finar, aseguró que “somos un Gobiernu que nestos dos años, magar les dificultaes, siempre quixo ser el Gobiernu de la esperanza; el Gobiernu de la recuperación de l’autoestima de los asturianos y asturianes; el Gobiernu que reivindica de forma permanente esi arguyu d’asturianía”.