Entama la vacunación a los ventiañeros díes depués de superar la peor cifra de contaxos de la tercer fola

El vienres la Conseyería de Salú informó de 628 contaxos, cifra que supera la peor de la tercer fola y que ye la tercera más alta rexistrada en tol andanciu. Esti datu llega nel momentu nel qu’entama la vacunación del tramu d’edá de 20 a 29 años y con una media diaria na selmana pasada de 493 casos nuevos de COVID-19.

Les menores de 30 yá tán siendo vacunaos, avanzando asinal nel procesu d’inmunización. L’informe últimu de vacunación, con datos d’ayeri, afita que’l 67,87 por cientu de la población diana, 633.915 persones, yá tienen la pauta completa, un 62,22 por cientu de los ciudadanos del país.

No que respeuta a la primer dosis, tiénenla 709.618 asturianos, un 75,97 por cientu de los mayores de 12 años y un 69,95 del total. 11.545 persones refugaron hasta’l momentu la vacuna.

Siguen aumentando los positivos

La selmana pasada tornaron a aumentar los positivos, al rexistrar 3.449 polos 3.133 de l’anterior. Entamaba esti periodu, llueu d’una revisión, con 58.448 casos detectaos y ayeri esta cifra algamaba los 61.897 –l'actualización aumenta esta cifra hasta 61.942–.

Ello supón una media diaria de 493 positivos, polos 196 y los 448 de les dos previes. Dende qu’entamó la tercer fola, la evolución d’esti datu foi’l siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57, 196 y 448, hasta los 493 actuales, superando asina la peor cifra del añu.

No que se refier a la fin de selmana, detectáronse 1.355 casos nuevos, cifra asemeyada al anterior, cuando se comunicaron 1.358. El vienres hebo 628, la tercer peor cifra de tola pandemia, namái superada polos 807 del 13 de payares y los 675 del día anterior, y mayor que la más alta de la tercera fola, los 614 del 26 de xineru; el sábadu, 369; y el domingu, 359.

Ayeri la tasa de positividá diaria quedó nun 14,18 por cientu llueu de la realización de 3.441 pruebes de diagnósticu d'infeición activa. El xueves esti porcentaxe a 7 díes yera del 14,08 por cientu –ayeri baxó al 13,9 por cientu–.

2 finaos

Estes xornaes hebo que llamenta la muerte de dos homes, ún de 65 años el vienres y otru de 60 ayeri. Nel andanciu finaron cola enfermedá causada pol coronavirus SARS-CoV-2 un total de 1.987 persones –l'actualización incorpora un fináu más en díes anteriores non contabilizáu–.

Un centenar de pacientes tán hospitalizaos con confirmación o sospecha de COVID-19, a los qu’hai que sumar otros 21 na UCI. Son 19 y 3 más que’l xueves, de manera respeutiva.

Na semeya, el conseyeru Pablo Ignacio Fernández Muñiz, que visitó'l puntu de vacunación n'Avilés, nel Complexu Deportivu Los Canapés.