Carreño viaxa a Tokiu llueu de ganar el so primer ATP 500

El tenista xixonés venció n'Hamburg al superar na final al serbiu Filip Krajinović por 6-2 y 6-4.

Pablo Carreño aporta a los Xuegos Olímpicos de Tokiu nun bon estáu de forma y coles medayes na cabeza. El so trunfu nel Hamburg European Open, el so primer ATP 500, confírmalo.

El deportista formáu nel Real Grupo de Cultura Covadonga tenía como meyores trunfos na so carrera individual hasta la fecha cinco ATP 250: Winston-Salem y Moscú (2016), Estoril (2017), Chengdú (2019) y Marbella (2021). Nun Grand Slam tien llegao en dos ocasiones a semifinales del US Open, nel 2017 y nel 2020.

En dobles con Davidovich

El sábadu arranca nel Parque de Tenis d'Ariake la competición de tenis de les Olimpiaes, onde Carreño, que tamién va competir en dobles xunto col andaluz Alejandro Davidovich, va llegar cola motivación que da un títulu del nivel d'Hamburg y la confianza del bon xuegu desendolcáu. Na final, Krajinović nun foi rival pal xixonés, que nun regaló nin un set en tol tornéu.