Fina'l Padre Lobo, autor de tornes relixoses y estudiosu del vocabulariu y toponimia de Nembra

Pepín Álvarez Lobo naciera nel 1937 na población ayerana y fora misioneru en Nicaragua xunto con Gaspar García Laviana.

Ayeri finó na Casa Sacerdotal d’Uviéu’l relixosu dominicu, conocíu como Padre Lobo o Pepín el de Manuela la d’Antón. Natural de Nembra, ingresó pronto na Orde de Predicadores, na que recibió la ordenación presbiteral.

Llueu de la so presencia en Nicaragua en tiempos de la dictadura de Somoza xunto con García Laviana y los sandinistes, tuvo destináu en delles parroquies del conceyu de Tinéu. Siempre caltuvo un compromisu llingüísticu col asturianu que lu llevó a tornar una montonera d’obres relixoses al asturianu, como 'El tchibru de Xob', 'El tchibru de Nehemíes' y 'Isaíes', amás de 'El Sentu Roseriu' o les homilíes, y asoleyó tamién un estudiu de toponimia y vocabulariu de Nembra nel qu’amosaba’l so fondu conocimientu de la variedá del asturianu de la so zona.

Iniciativa pol Asturianu llamenta la so perda y tresllada a la so familia y comunidá’l pésame de tola organización, al que se suma l'equipu que forma Asturies.com.