El pieslle del interior de llocales d'ociu nocherniegu llega con una media de 448 contaxos diarios

La selmana pasada rexistráronse 448 contaxos diarios de media, polos 57 y 196 de les dos anteriores. Un aumentu vertixinosu que lleva a la Conseyería de Salú a pesllar dende la nueche d'esti llunes l’interior nos chigres d’ociu nocherniegu, que van poder siguir abriendo hasta les 3, y a prohibir la venta d’alcohol en gasolineres y tiendes de 22 a 6 hores.

El sábadu avanzábase esta midida, que se concretó esta tarde cola espublización nel BOPA d’una resolución con estes dos restricciones per 14 díes que lleguen depués d’un mes d’apertura de los pubs y discoteques hasta les 3. Foi’l 11 de xunu, un mes depués tamién del fin del estáu d’alarma, cuando se flexibilizaron les restricciones venceyaes al ociu nocherniegu, un momentu nel qu’había una media diaria de 55 casos nuevos.

Agora esta cifra ye ocho vegaes mayor, 448, llueu de sumar na selmana anterior 3.133 positivos al pasar d’un total 55.277 a 58.410 –l'actualización suma 6 casos más hasta 58.416–. Son unes cifres asemeyaes a les del final de xineru, cuando la tercer fola taba averándose al so máximo.

Dende qu’ésta entamó la evolución de la media diaria selmanal de contaxos foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51, 57 y 196, hasta los 448 actuales. Mentes, la incidencia a 14 díes por cada 100.000 habitantes taba’l xueves en 325.

Un fináu de 68 años

Esta fin de selmana detectáronse 1.358 casos nuevos: 497 el vienres, 409 el sábadu y 452 el domingu. Nes dos anteriores rexistrárense 137 y 750.

La tasa de positividá ayeri foi del 15,78 por cientu llueu de la realización de 3.245 pruebes de diagnósticu d'infeición activa. A 7 díes esti porcentaxe yera'l xueves del 14,06 por cientu –ayeri xubió al 14,64 por cientu–.

Llueu de once díes ensin finaos con COVID-19, ayeri hebo que llamentar la muerte d’un home de 68 años. Ye la 1.982 dende qu’entamó l’andanciu.

Hai 67 pacientes hospitalizaos con confirmación o sospecha de la enfermedá causada pol coronavirus SARS-CoV-2, a los qu’hai que sumar 14 que tán na UCI. Son 15 y 2 más que’l xueves, de manera respeutiva.

Na imaxe, el presidente Adrián Barbón recibe esta mañana la segunda dosis de la vacuna de Pfizer/BioNTech nel recintu ferial de La Pola Llaviana. Semeya obra d'Armando Álvarez.