“La propuesta ‘Rock & Fierro’ resulta novedosa y sorprendente”, rellata Balbino Menéndez

La Banda de Gaites Camín de Fierro yá tien el so segundu discu a la venta, ‘Rock & Fierro’. Xunto con una formación de rock interpreta 12 cantares, 5 d’ellos cantaos, una “propuesta que ta resultando al públicu novedosa y sorprendente”, apunta Balbino Menéndez Suárez, direutor de l'agrupación xunto con Arsenio Ruiz González.

‘10 años nel camín’ foi, nel 2012, el primer discu de la banda que tien los sos raigaños nos conceyos de Proaza, Santu Adrianu y Teberga. Nueve años más tarde asoleya ‘Rock & Fierro’, un proyeutu que nada nun tien que ver col ventésimu aniversariu de la formación, como pudiera paecer, y que tien en ‘Días mejores’, cantar compuestu por Jorge Otero, la so carta de presentación.

“La idea arranca muncho enantes, sobre’l 2014 y 2015”, esplica Menéndez Suárez, y tien el so orixe “nel gustu personal y el convencimientu na viabilidá de llevala a escena”. Y ye que ‘Rock & Fierro’ nun ye un discu d’una banda de gaites acompañando a una de rock, sinón “d’una banda de gaites sonando como una banda de gaites”, coles sos harmoníes, les caxes sonando xunto cola batería…, y una de rock funcionando tamién como tal.

El resultáu final ye “un soníu integráu, compautu”, que ta llamando l’atención a los que yá pudieron sentir el discu. “La propuesta ta resultando al públicu novedosa y soprendente”, apunta’l codireutor de Camín de Fierro, qu’espera poder “defendela en direuto” pronto.

“Tamos preparaos p’actuar, si sal una fecha, nun plazu d’un mes”, avanza, con una puesta n’escena válida non sólo pa festivales de gaites, sinón tamién pa certámenes celtes, teatros y tou tipu d’escenarios. En total 25 músicos, los 20 de la banda acompañaos d’un cantante (Nacho Felipe Cabeza), guitarrista (Álvaro Bárcena), baxista (Sergio Rodríguez), teclista (Sam Rodríguez) y batería (Wilón DeCalle).

Retrasu pola pandemia

‘Rock & Fierro’, editáu por A Mansalva, compónenlu 12 temes, 5 d’ellos cantaos. En total 3 son n’asturianu, con lletres de Toli Morilla, Xune Elipe y ún tercer tradicional, y 2 en castellanu, de Pablo Moro y d’Otero, la nomada ‘Días Mejores’.

El discu grabóse ente abril del 2019 y febreru 2020 en Tutu Estudios y la pandemia retrasó’l so asoleyamientu hasta agora. Tamién del videu, que se rodó nesi mesmu febreru nel Teatru de la Llaboral baxo la direición de Titi Muñoz.

La propia Banda de Gaites Camín de Fierro ta vendiendo de manera direuta los trabayos, tamién disponibles na web musicasturiana.com y próximamente na FNAC. Tamién va poder sentise na plataforma dixital Spotify nun plazu curtiu de tiempu.