La selmana pasada rexistráronse 196 casos nuevos diarios de media

Esti aumentu llega depués de dos meses con cifres cercanes al mediu centenar de contaxos. Acumúlense cinco xornaes ensin finaos.

Los viaxes d'estudiantes y fiestes, xunío a una mayor interacción social depués del final del cursu, provocaron un importante aumentu de los contaxos n'Asturies depués de que se caltuviera la curva en meseta dende'l final del estáu d'alarma. Éstos danse principalmente ente menores de 30 años, lo que permite que la presión hospitalaria nun aumente al nivel de les trés foles anteriores, anque l'Atención Primaria ta nestos momentos desbordada.

La Conseyería de Salú, dada la situación, decidió entamar un cribáu ente moces y mozos de 15 a 30 años. De momento, 6.000 persones acudieron a la llamada de les autoridaes.

Entamó la selmana, llueu d'una revisión de datos, con 53.885 positivos confimaos y finóla con 55.256 –l'actualización de los datos aumenta la cifra en 4 hasta 55.260–. Son 1.371 contaxos nos 7 díes últimos polos 399 de l'anterior, lo que supón pasar d'una media diaria de 57 casos a 196.

Estes cifres tán al nivel de les de la segunda selmana de febreru, cuando se rexistró una media de 226. La evolución d'esti datu dende l'entamu de la tercer fola hasta agora foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55, 51 y 57, hasta los 196 actuales.

750 positivos esta fin de selmana

Esta fin de selmana'l númberu de contaxos detactaos foi 750, cuando l'anterior se rexistraron 137. El vienres comunicóse la cifra más alta, 330, la cantidá mayor dende'l 5 de febreru, xornada na que s'informó de 412 –una revisión aumentó los casos a 416–, mentes que'l sábadu baxó a 263 y el domingu, a 157, con una tasa de positividá diaria del 9,85 por cientu.

A 7 díes esti porcentaxe taba'l xueves nel 6,15 por cientu –ayeri xubió al 9,97 por cientu–, doblando prauticamente'l 3,58 del llunes pasáu. La Organización Mundial de la Salú (OMS) marca'l 5 por cientu como referencia a partir de la que s'empieza a perder el control de la pandemia.

La nota positiva ye l'ausencia de muertes per quinta xornada siguida. Asina, el total de finaos pola enfermedá causada pol coronavirus SARS-CoV-2 caltiénse en 1.980.

Hai 49 hospitalizaos con confirmación o sospecha de COVID-19, a los qu'hai que sumar otros 12 que tán na UCI. Son 16 y 1 más que'l xueves, de manera respeutiva.

Na semeya, una persona recibe'l vienres la vacuna nel pabellón xixonés de Pechera-La Braña na ventana abierta pol SESPA p'alministrar el preparáu a los ciudadanos mayores de 70 años colos que nun se pudo contautar o refugaron recibila nel so momentu.