La campaña de vacunación cumple seis meses con 664.782 asturianos con una dosis

Supón el 73,76 por cientu de la población diana y el 65,25 de la total. La selmana pasada rexistráronse 57 contaxos diarios de media.

El 27 d'avientu del 2020, en Xixón, na Mesta de Pumarín, tenía llugar un fechu históricu: vacunábase per primer vegada contra la COVID-19 n'Asturies depués de nueve meses d'una pandemia que llevó muncha xente, sobre manera mayor. Seis meses depués 664.782 persones yá cuenten con una dosis, de les que 439.956 tienen la pauta completa –un 48,82 por cientu de la población diana y un un 43,18 de la total–.

Namái 11.436 asturianos refugaron poner la vacuna, de la que s'alministraron cuatro tipos, siendo la mayoritaria la Comirnaty de Pfizer/BioNTech, con 789.496 dosis de les 1.070.513 puestes. Ésta foi precisamente cola qu'entamó la campaña.

Ensin finaos esta fin de selmana

Nos 7 díes últimos detectáronse 399 casos nuevos, pasando de 53.474 positivos a 53.873 –l'actualización suma 1 más pa poner el total en 53.874–. Supón una media diaria de 57, la cantidá más alta dende'l fin del estáu d'alarma.

Dende qu'entamó la tercer fola la evolución d'esti datu foi la siguiente: 78, 101, 167, 292, 421, 482, 383, 226, 154, 135, 144, 113, 113, 119, 115, 121, 126, 115, 84, 52, 49, 53, 51, 50, 55 y 51, hasta los 57 actuales. Como se pue comprobar, dende'l momentu de flexibilización de les midíes fixo que se frenara'l descensu de la curva y s'entrara nuna meseta que paez picar p'arriba estos díes, tando na actualización última, con datos del xueves, la incidencia acumulada a 14 díes en 74,70 casos cada 100.000 habitantes –ayeri quedó en 74,21–.

Esta fin de selmana última, sicasí, detectáronse 137 contaxos –138 finalmente–, polos 151 de l'anterior. El vienres comunicáronse 56, el sábadu 34 y el domingu 47, ésti día últimu con una tasa de positividá del 3,41 por cientu, tando esti porcentaxe a 7 díes el xueves nel 3,43 por cientu –ayeri xubió al 3,58 por cientu–.

Nun hebo que llamentar finaos estos díes, polo que s'acumulen trés xornaes ensin muertes. No que va del andanciu contabilizáronse 1.979 perdes cola enfermedá causada pol coronavirus SARS-CoV-2.

Tán hospitalizaos 43 pacientes con confirmación o sospecha de COVID-19, 4 menos que'l xueves. Mentes, siguen na UCI otros 13.