Éstos son los doce mensaxes que dexa la III Encuesta Sociollingüística del Navia-Eo

El so autor, Francisco José Llera Ramo, rescampló esta docena de puntos del estudiu.

El xueves presentábase nel llar de l'Academia de la Llingua Asturiana (ALLA) l'avance de datos de la III Encuesta Sociollingüística del Navia-Eo, que llega dos décades depués de la última, fecha nel 2002. Ésta divídese en cinco estayes –la identidá del Navia-Eo, la identidá llingüística nel Navia-Eo, desenvolvimientu llingüísticu y alfabetización, vezos llingüísticos, y actitúes y demandes llingüístiques–, con unes primeres conclusiones que'l sociólogu resumió en doce mensaxes.

Éstos son:

1. Los habitantes del Navia-Eo espresen de manera mayoritaria la so identidá asturiana.
2. Consensu xeneral sobre l'asturianidá de la fala del Navia-Eo y la so diferenciación del gallegu.
3. Desapaición cuasi absoluta del estigma llingüísticu ente los habitantes del Navia-Eo.
4. Trés de cada cuatro habitantes del Navia-Eo son falantes de fala, y más de la metá tán alfabetizaos.
5. Altu nivel d'usu de la fala eonaviega magar la diferenciación d'espacios pola falta de normalización.
6. Retrocesu interxeneracional conteníu, magar que la llingua eonaviega sigue siendo la llingua materna mayoritaria y que los falantes confíen nel so futuru.
7. Los habitantes quieren un horizonte billingüe pal Navia-Eo.
8. Los habitantes del Navia-Eo quieren una mayor presencia de la so llingua vernácula nos medios
9. Los habitantes del Navia-Eo apuesten pola proteición de la llingua vernácula y cuestionen les limitaciones de la política llingüística autonómica, anque reconocen avances.
10. Los habitantes del Navia-Eo apoyen la normalización y el billingüismu.
11. Apoyu cuasi unánime a la presencia de la fala na escuela.
12. Apoyu mayoritariu a la cooficialidá del asturianu y eonaviego.