“La fala eonaviega ye una llingua en claru procesu de recuperación”, asegura Llera Ramo

Un 75 por cientu los habitantes del Navia-Eo considera que la fala eonaviega merez el mesmu tratu que’l restu d’idiomes del Estáu, y un 47 por cientu sofita la oficialidá de la so llingua por un 36 que diz refugala. Son los datos del avance de la III Encuesta Sociollingüística del Navia-Eo fecha por Francisco José Llera Ramo presentaos esti xueves.

“La fala eonaviega ye una llingua en claru procesu de recuperación”, aseguró’l sociólogu direutor del Euskobarómetro, responsable tamién de la ellaboración de les dos anteriores, feches nel 1990 –primera entamada n’Asturies, encargada pol Gobiernu, pero non espublizada– y nel 2002. La intención yera facer esti terceru, al igual que’l segundu, de manera conxunta nel 2017, pero la falta de financiación nun lo permitió nesi momentu.

Les perres que recibió l’Academia de la Llingua Asturiana (ALLA) a cargu de los Presupuestos Xenerales del Estáu, una inyeición de 40.000 euros, destináronse a esti estudiu y a los llabores pa la realización del Diccionariu del Navia-Eo. “Los resultaos son razonablemente favoratibles al caltenimientu de la llingua y a facer política llingüística”, avanzaba previamente’l so presidente, Xosé Antón González Riaño nel actu celebráu nel llar de la institución.

“Si na segunda encuesta lo que detectábamos claramente yera un retrocesu con respeuto a la primera, porque l’impautu de les polítiques de política llingüística nun se dexaren notar, agora atopamos lo que mesmu que nel añu 17 nel conxuntu d’Asturies col asturianu: un claru procesu de recuperación”, insistió Llera, qu’apuntó al sistema escolar como principal motivu d’esti cambiu de tendencia. Nesti puntu fixo una presentación de los principales datos dividíos en doce estayes, anque l’estudiu divídese en cinco: la identidá del Navia-Eo, la identidá llingüística nel Navia-Eo, desenvolvimientu llingüísticu y alfabetización, vezos llingüísticos, y actitúes y demandes llingüístiques.

Los datos principales afiten que la gran mayoría d’habitantes de la rexón, al rodiu del 75 por cientu, “piensa que la so llingua vernácula merez, como mínimo, igual tratu que’l dau poles instituciones respeutives al valencianu, el catalán, el vascu, el gallegu o’l balear”, una posición que coincide cola que se caltién nel restu del país con respeuto al asturianu. Son favoratibles a la oficialidá de la fala eonaviega, como prefier nomala la mayoría de la población, un 47,1 por cientu del total de ciudadanos (un 28 d’alcuerdu dafechu y un 19 de forma parcial) por un 36 que s’opón (un 29 dafechu y un 7 de manera parcial), con un 16 por cientu que se declara indiferente.

En comparanza colos datos del 2002 rescampla la mengua de xente ensin postura nidia en 18 puntos, al tar esti porcentaxe nel 34 por cientu. Mentes, el sofitu a la igualdá de derechos llingüísticos colos falantes de castellanu aumenta en 20 puntos y les persones en contra, en 10.

Mentes, namái un 1 por cientu escoyó la respuesta ‘nun sabe/nun contesta’ cuando hai dos décades foi un 12 por cientu. No que respeuta a la oficialidá del asturianu, nel Eo Navia’l so apoyu aumenta con respeuto al gallego-asturiano hasta’l el 48,1 por cientu (27 y 21), con un 37 por cientu d’oposición (28 y 9) y un 14 por cientu d’indiferentes.

Identidá asturiana

Otros datos destacaos del estudiu son que 3 de cada 4 habitantes del llugar tienen el sentimientu de ser “asturianu hasta la médula”, con un 18 por cientu que se considera asturianu pero tamién gallegu. La opción “asturianu y gallegu” escoyóla un 7 por cientu, “gallegu, pero tamién asturianu” un 1 por cientu y “otres posibilidaes”, un 4 por cientu.

A la hora de referise al idioma, un 65 por cientu llámala fala eonaviega –supón un aumentu de 14 puntos con respeuto al 2002–, "qu'inclúi les sos variantes llocales", espón el testu del avance, por un 7 por cientu que se refier a ella como gallego-asturiano –baxó 17 puntos–, términu emplegáu pola Alministración. Un 14 por cientu nómala asturianu o bable.

Un 64 por cientu considérala un amiestu de gallegu y asturianu y un 13 por cientu una variante del gallegu, mentes qu’un 8 del asturianu. Un 9 por cientu cree que ye distinta al asturianu y al gallegu, y un 3 por cientu una variante del castellanu.

La fala eonaviega ye una llingua pa un 63 por cientu de los encuestaos, pero non pol 33 por cientu –ye un aumentu de 11 puntos en comparanza con hai dos décades–. Sobre cuála ye la llingua propia d’Asturies, el 66 por cientu apunta que son “el castellanu, l’asturianu y la fala eonaviega” –47 puntos más–; el 15 por cientu, “el castellanu” –4 menos–; el 10 por cientu “l’asturianu y la fala eonaviega” –5 menos–; y el 5 por cientu “l’asturianu” –41 menos–.

Desaniciu del estigma llingüísticu

Llera conclúi que retrocede cuasi hasta’l desaniciu l’estigma llingüísticu nel Navia-Eo, siguiendo la tendencia de l’anterior encuesta. “Anguaño’l 90 por cientu de los habitantes de la zona refugen la idea de qu’espresase en fala eonaviega sía falar mal y en castellanu, falar bien”, apuntó’l caderalgu en Ciencies Polítiques y Socioloxía.

“El nivel de conocimientu de la fala ye mui altu y cuasi la metá de los falantes tán alfabetizaos”, siguió, “lo qu’amuesa claramente esi procesu de recuperación y poro tamién de normalización”. Trés de cada cuatro, un 76 por cientu, son falantes, “y los falantes potenciales son el 95 por cientu de la población”, un datu “significativu” pa Llera al ser un cuarta parte de la población non nacida na zona.

En comparanza coles cifres de la encuesta sobre l’asturianu del 2017, el de Caravia l’Alta, apunta que l’eonaviegu “ta meyor conservao y en meyor procesu de recuperación, quiciabes porque ye una zona predominantemente rural”.

El futuru

Sobre la evolución del usu del gallego-asturiano na década última, la mayoría considera que tanto ellos (45,3 por cientu) como’l so entornu (47,3 por cientu) usa la fala de manera asemeyada a diez años atrás. Un 27,6 y un 35,8 por cientu, de manera respeutiva, ve un retrocesu faláu, por un 15 y un 14,3 por cientu qu’opina qu’hai un mayor emplegu.

Anque, apunta Llera, esto nun sía asina según la encuesta, “la perceición qu’ellos tienen ye que se ta produciendo un retrocesu”. Asina, pal futuru’l 35 por cientu piensa que l’usu va ser paecíu, un 28 por cientu cree que va ser dalgo menor, un 17 por cientu muncho menor, un 11 por cientu dalgo mayor y un 3 por ciertu muncho mayor.

Sobre’l peligru de desaniciu del idioma, amuésense confusos, aunque un 60 por cientu son optimistes: un 32 por cientu cree que nun lo va facer y un 28 piensa que vivirá con dificultaes, mentes qu’un 25 piensa que “sí, poco a poco” y un 11 por cientu venceya la so sobrevivencia a otros factores.

Horizonte billingüe

“Más de 2 de cada 3, el 69 por cientu, desea un futuru billingüe pa la zona na que se fale al menos tanto o más eonaviego como castellanu”, siguió Llera. En concreto, un 59,3 y un 10 por cientu, de manera respeutiva. Al contrario, un 11,8 por cientu quier un monollingüismu castellanu na rexón y un 5 por cientu eonaviegu; y un 13 por cientu que s’use más la llingua castellana.

“Podemos afirmar que la sociedá asturiana aspira mayoritariamente a un futuru billingüe na so comunidá na que les dos llingües vernácules, l’asturianu y l’eonaviegu, convivan col castellanu d’una manera normalizada”, aseguró Llera tres confirmar unos datos mui asemeyaos al estudiu últimu sobre l’asturianu. Dalgo que se ve tamién nel deséu del 74 por cientu de que les neñes y neños sepan gallego-asturiano, por un 8 por cientu que nun quier y un 17 al que-y ye indiferente.

“Tienen la perceición de qu’hai riesgu de retrocesu, pero al empar tienen voluntá que nun se produza, y el primer pasu ye que los neños puedan saber” l’idioma, apuntó darréu, rescamplando que “esti 74 por cientu ye l’indicador más importante dende’l puntu de vista d’esa reproducción llingüística”. Un 68 por cientu, mentes, conoz bien la fala o quier ameyorala, “y namái hai un terciu que lo refuga”.

Sobre la presencia de los medios de comunicación escritos, un 46,3 por cientu considera que ye insuficiente, una insatisfaición qu’aumenta nel casu de la RTPA al 58,5 por cientu, opinando que debería aumentar la so temática.

Política Llingüística y escuela

“Cuasi 3 de cada 4, el 70 por cientu tamién, cree que la sociedá y les instituciones deberíen implicase activamente na proteición de les llingües vernácules poniendo tolos sos medios al so algame, frente a un minoría en desacuerdu, el 14 por cientu, o que-y resulta indiferente, otru 14 por cientu”, esplicó Llera sobre la política llingüística, que los habitantes de la zona valoren d’una manera más positiva que con respeuto a la segunda encuesta (un 34,8 por cientu, 30 puntos más). Sicasí un 29,8 por cientu cree que’l Gobiernu nun fai nada o cuasi nada por conservar l’idioma.

Sobre’l procesu d’estandarización y normalización de la fala, un 63,5 por cientu apuesta por ello pa protexer la llingua, “anque dalgunos condiciónenlo a que nun sía artificial y, sobre manera, que sía respetando les variantes llocales”. El consensu sobre la presencia del idioma na escuela ye cuasi plenu, con un 86 por cientu a favor (66 por cientu como optativa y 20 como obligatoria), por un 13 por cientu en contra.

“Podemos concluyir que, a la vista de la evolución de los principales indicadores estudiados, tamos énte una clara recuperación”, repitió Llera, que matizó que “ye una recuperación con clarescuros”. Los resultaos definitvos del estudios daránse a conocer a lo cabero del añu, confirmó González Riaño.

400 encuestes

La III Encuesta Sociollingüística del Navia-Eo ellaboróse con 400 encuestes con cuestionariu estructuráu feches de manera telefónica nesta ocasión por cuenta de la pandemia de COVID-19 ente'l 10 al 24 de mayu d’esti mesmu añu. Participaron mayores de 16 años de los 18 conceyos del Navia-Eo y el marxe d'error muestral ye del +-4,08 por cientu.

Na semeya, González Riaño y Llera Ramo.